Paketa me ligjet e ashpra të emigracionit që parlamenti i Britanisë së Madhe ka votuar, me qëllimin për t’i dhënë fund kalimit të azilkërkuesve në Kanalin Anglez duket se nuk ka dhënë asnjë efekt në anën tjetër të kufirit, pasi emigrantët në Francën veriore vijojnë të presin ditët me mot të ngrohtë për të bërë udhëtimin e rrezikshëm.
Sipas mediave britanike, dy gomone me 83 emigrantë janë shpëtuar në Kanal pasi i ishin drejtuar brigjeve të Mbretërisë së Bashkuar.
Roja bregdetare franceze tha se disa varka të vogla u përpoqën të kalonin Kanalin të dielën, ku dy prej tyre hasën në vështirësi në brigjet e Gravelines.
Në të njëjtën ditë, roja bregdetare tha se 54 njerëz ishin shpëtuar nga një varkë dhe 29 nga një tjetër.
Prefektura detare e “la Manche et de la mer du Nord” sqaron se ata janë shpëtuar në anën franceze të kufirit dhe për këtë arsye janë dërguar në portin e Calais, ku u pritën nga shërbimet e urgjencës.
Lajmi mbi dy varkat vjen pasi Ministria e Mbrojtjes e Britanisë tha se 26 emigrantë në një varkë të vogël kaluan Kanalin për të arritur në Mbretërinë e Bashkuar të shtunën.
Numri i emigrantëve që kanë bërë kalimin e rrezikshëm në muajin e parë të këtij viti tani është rritur mbi 1000 – me dhjetëra që kaluan Kanalin Anglez të dielën në mëngjes.
Rreth 50 burra, gra dhe fëmijë u sollën në Dover më herët të dielën nga Forca Kufitare e Mbretërisë së Bashkuar. Fotot e marra në Portin e Doverit të dielën në mëngjes tregojnë zyrtarët e Forcave Kufitare duke ndihmuar emigrantët të veshur me jelek shpëtimi dhe të mbështjellë me peshqir.
Shifrat tregojnë se kalimet në Kanalin Anglez po ecin gjerësisht me të njëjtën periudhë kohe në vitin të kaluar, ku 1,341 njerëz hynë në Mbretërinë e Bashkuar përmes kësaj rruge.
