Ish-ministri i Financave, Shkëlqim Cani është thirrur në SPAK mëngjesin e kësaj të hëne. Në urdhrin e lëshuar nga Prokuroria e Posaçme nënvizohet se Cani është thirrur për t’u marrë në pyetje nga prokurori Elvin Gokaj, por ende nuk dihet çështja për të cilën kërkohet dëshmia e ish-ministrit.
Dyshimet janë se ish-ministri i Financave është thirrur për të dëshmuar si person që ka dijeni mbi aferën e Inceneratorëve.
Kjo pasi, Cani në dëshminë e dhënë në Komisionin e Inceneratorëve që u ngrit në Kuvend tha para anëtarëve se ka refuzuar të miratojë projektin e djegësit të mbetjeve në Elbasan pasi sipas tij nuk ishin respektuar procedurat në përputhje me ligjin.
“Ashtu është, kemi një korrespondencë që bazohet në legjislacionin në fuqi, VKM që kërkon një set dokumentesh që duhen plotësuar në mënyrë që ministria të bëj shqyrtimin. Neni 21 është që ministria e Financave miraton apo jo. Kështu që ne kemi refuzuar, mbështetur në kërkesat ligjore dhe aktet nën ligjore. Është normale. Ndërkohë ka ardhur dhe një projektvendim ku kërkohej të zbatohet një procedurë të veçantë për inceneratorin. Kjo procedurë ka marrë përgjigje nga ne që nuk përputhet me ligjin për arsye se tre janë opsionet, nuk është në këto të trija dhe natyrshëm kemi thënë që merreni dhe kthejeni, e gjeni një nga tre mënyrat për të bërë veprimet përkatëse me VKM. Ne kërkojmë edhe të dhëna për firmën, që ne e shohim nga kapacitetet financiare nëse e përmbush këtë detyrë, lidhur me financimin, sepse ministria e Financave është një ministri konservatore që kërkon që lekun të kthehet mbrapsht”, shprehej Cani në mbledhjen e 22 shkurtit 2022.
Kujtojmë se Cani mbajti postin e ministrit të Financave në kabinetin “Rama 1”, në periudhën kohore 2013–2016.
Ai u largua më pas nga politika aktive duke dhënë vetë dorëheqjen nga detyra dhe u pasua nga Arben Ahmetaj si ministër.
