Përplasja midis Britanisë së Madhe dhe Rusisë që nga nisja e luftës në Ukrainë ka qenë e ashpër dhe liderët e të dyja vendeve nuk i kanë kursyer asnjëherë kërcënimet dhe thirrjet e ashpra në drejtim të njëri-tjetrit.
Por ajo çka ka zbuluar Boris Johnson në një seri dokumentarësh të BBC-së të quajtur “Putin kundër Perëndimit”, i cili do të transmetohet sonte, për kërcënimet e liderit të Kremlinit ndaj tij zbulon se urrejta mes dy vendeve është më e madhe seç imagjinohej.
Ish-kryeministri i Britanisë së Madhe thotë se Putin e ka kërcënuar atë me një sulm raketash nëpërmjet një telefonate “të jashtëzakonshme”, në prag të nisjes së aksionit ushtarak për të pushtuar Ukrainën.
Teksa Johnson i kishte kërkuar që të ndalte planin e tij duke i thënë se “lufta do të ishte katastrofë e plotë”, gjatë një telefonate shumë të gjatë mes tyre në shkurt të 2022, Putin i ishte drejtuar duke thënë: “Boris, nuk dua të të lëndoj, por, me një raketë, do të më duhej vetëm një minutë, ose diçka e tillë”.
“Por, unë mendoj se nga toni i zërit, ai ishte shumë i qetë… Thjesht po luante së bashku me përpjekjet e mia për ta detyruar atë të negocionte”, sqaroi Johnson.
Ndërkohë, ish-kryeministri britanik shton se e paralajmëroi Putinin se pushtimi i Ukrainës do të çonte në sanksione perëndimore dhe më shumë trupa të NATO-s në kufijtë e Rusisë.
“Ai më tha: ‘Boris, ti thua se Ukraina nuk do të bashkohet me NATO-n së shpejti… çfarë do të thuash me së shpejti?’ Dhe unë i thashë: “Epo, nuk do të bashkohet me NATO-n për një të ardhme të parashikueshme. Ju e dini këtë shumë mirë”, shtoi Johnson.
Johnson luajti një rol udhëheqës në nxitjen e mbështetjes perëndimore për Ukrainën vitin e kaluar, në një kohë kur lojtarët kryesorë, duke përfshirë Gjermaninë, Francën dhe Italinë, po luhateshin.
Ai konfirmoi se kishte opinione të ndryshme në mesin e aleatëve perëndimorë, pasi disa hezitonin të hiqnin dorë nga varësia e tyre nga nafta dhe gazi rus. “Një argument që u vendos, veçanërisht nga miqtë tanë gjermanë, ishte se kur bëhej fjalë për sanksionet, kishin nevojë për paqartësi krijuese”, tha ai.
