Nga Boldnews.al
Qeveria në ditët e fundit ka vendosur të verë në zbatim dhe të detyrueshëm aplikacionin e quajtur “Aktivisti”, për tu përdorur për punonjësit e administratës shtetërore të të gjithë niveleve. Boldnews.al ka mundur të flasë me disa nga punonjësit që janë vënë nën presion të vazhdueshëm për tu përfshirë në këtë aplikacion të ri.
Aplikacioni është i ngjashëm me një portal i cili publikon të gjitha aktivitetet e kryeministrit, ministrave, drejtorive të ndryshme, kryeparlamentares dhe deputetëve të PS-së. Punonjësit janë të detyruar që të marrin pjesën propagandistike të postimeve dhe t’i bëjnë share dhe like në faqet e tyre në rrjetet sociale.
Për të kontrolluar sa lajme propagandistike ka shpërndarë një punonjës, shërben një numërues pikësh që shkon drejtëpërdrejtë në duart e drejtuesve të institucioneve. Një share shpërblehet me një pikë, ndërsa një like shpërblehet me 0-5 pikë. Çdo punonjës është vënë nën trysni duke e shpërndarë aplikacionin tek njerëz të afërt që të bëjnë share në faqen e tyre.
Sipas burimeve të Boldnews.al, punonjësit kanë nisur të thirren nga drejtuesit e institucioneve ku punojnë duke ua bërë të qartë se monitorohen vazhdimisht nëse janë ose jo aktivë në këtë aplikacion propagandistik.
Disa që nuk kanë arritur të kënaqin shefat janë paralajmëruar se mund të penalizohen në vijim, deri në humbje të vendit të punës. Aplikacioni fillimisht ka qarkulluar në zyranë propagandistike të kryeministrit në muajin prill të vitit të kaluar ku është testuar për disa kohë. Pasi e kanë konsideruar si të suksesshëm e kanë shpërndarë duke e bërë të detyrueshme në të gjithë administratën shtetërore.
Trysnia u është shtuar edhe më shumë dy ditët e fundit ku punonjësit janë udhëzuar se për shkak të skandalit të kryeministrit Edi Rama në përfshirjen e tij me ish-kreun e antiterrorit të FBI në aferën e ryshfetit dhe lidhjeve me oligarkët rus pranë Putinit, të shtohen share-t dhe like-t në postimet e lajmeve propagandistike në mënyrë që faqet e rrjeteve sociale të minimizojnë lajmet që hidhen për skandalin e madh.
Aplikacioni “Aktivisti” gjithashtu është i detyruar të hapet edhe tek punonjësit e administratës shtetërore dhe lokale në çdo rreth të vendit. Sipas burimeve të Boldnews.al, shumë punonjës të vendosur nën trysni pasi u numërohen pikët janë të detyruar që të lenë shpesh punën e tyre dhe qëndrojnë për një kohë të gjatë në rrjetet sociale. Gjithashtu, aplikacioni që është instaluar tek telefonët e punonjësve jep një sinjal sa herë ka një postim të ri nga kryeministri, ministrat dhe deputetët e PS-së. Këtu nis “beteja” e shpërndarjes së informacioneve propagandistike pasi pikët u numërohen.
