Erion Veliaj është Kryetar i Bashkisë së Tiranës. Ai lindi në Tiranë, më 17 dhjetor 1979. Pas përfundimit të shkollës së mesme në gjimnazin “Sami Frashëri”, ai ndoqi studimet e larta në SHBA, ku është diplomuar për “Shkenca Politike” në Grand Valley State University, Michigan. Më pas, ai përfundoi studimet Master në Mbretërinë e Bashkuar pranë University of Sussex, me fokus tek Integrimi Europian. Përpara se të kthehej në Shqipëri në vitin 2003, Erion Veliaj ka punuar në Amerikën e Veriut e të Jugut, Afrikën Lindore dhe në Kosovë.
Në vitin 2003, Veliaj themeloi lëvizjen MJAFT. Erion Veliaj drejtoi lëvizjen MJAFT deri në Nëntor të vitit 2007. Në zgjedhjet parlamentare të vitit 2009 ai ishte kandidat për Kuvendin e Shqipërisë përmes listës civile G99.
Në periudhën 2007–2009, Veliaj iu bashkua Iniciativës për Stabilitetin Europian. Në vitin 2011, Veliaj iu bashkua kryesisë së Partisë Socialiste të Shqipërisë si Sekretar për Rininë dhe Emigracionin.
Në zgjedhjet parlamentare të vitit 2013, Veliaj ishte kandidat i Partisë Socialiste në qarkun e Gjirokastrës, nga ku u zgjodh deputet i Kuvendit të Shqipërisë. Në shtator të vitit 2013, Veliaj u emërua Ministër i Mirëqenies Sociale dhe Rinisë.
Nën logon e koalicionit ASHE të udhëhequr nga PS, Erion Veliaj fitoi zgjedhjet lokale në vitin 2015, duke marrë postimin e kryetarit të Bashkisë së Tiranës, që e mban aktualisht. Në lokalet e 14 Majit 2023, ai kandidon nën logon e PS për një mandat të tretë.
* CV e Erion Veliajt, bazuar në faqen zyrtare të Bashkisë Tiranë
