Arrestimi dhe akuzat për korrupsion dhe lidhje me oligarkët rusë të sanksionuar nga SHBA për ish-zyrtarin e FBI-së, Charles McGonigal duket se janë kthyer në një çështje dite në SHBA.
Ish-zyrtari, i cili njihet si një mik i afërt dhe lobist i kryeministrit Edi Rama akuzohet gjithashtu se ka marrë 225,000 dollarë teksa punonte në FBI nga Arben Neza (i njohur në dosje si “Personi A”).
Neza që jeton në Nju Xhersi duket se ka prezantuar Ramën me McGonigal dhe dyshohet të ketë paguar udhëtimet e ish-zyrtarit për në Tiranë e Austri, kun ë katër raste ai është takuar “kokë më kokë” me kryeministrin e Shqipërisë.
Charles McGonigal, ish-kreu i kundërzbulimit për zyrën e FBI-së në Nju Jork, akuzohet se ka punuar fshehurazi për një oligark rus të sanksionuar nga SHBA, Oleg Deripaska, si dhe për komplot për të kryer pastrim parash.
Prokurorët thanë se McGonigal dyshohet se është përpjekur të ndihmojë Deripaskën të largohet nga lista e sanksioneve pas largimit nga FBI në 2018. Ai gjithashtu dyshohet se i ka marrë para miliarderit rus në 2019 për të hetuar një oligark rival.
Sakaq, Neza ka shërbyer më parë si agjent i SHIK dhe kishte interesa biznesi në Evropë.
Për arrestimin e McGonigal ka reaguar edhe ish-Presidenti i SHBA-ve, Donald Trump, i cili ka shpërthyer me gëzim në rrjetin social ‘Truth Social’ me shprehjen: “U kalbsh në ferr!”
Reagimi i Trump erdhi pasi ish-zyrtar i FBI-së ka qenë i përfshirë në hetimin për lidhjet e dyshuara mes ekipit të fushatës së ish-presidentit në vitin 2016 dhe Rusisë.
Ndërsa nuk ishte i lidhur me hetimin, McGonigal ishte një nga figurat kryesore pas hetimit për marrëveshjen e dyshuar ruse në zgjedhjet e vitit 2016.
McGonigal ishte një nga figurat e para të FBI-së që u vu në dijeni të pretendimeve se George Papadopoulos, një këshilltar i fushatës së Trump-it, mburrej se e dinte se rusët kishin materiale kompromentuese mbi kandidaten demokrate Hillary Clinton.
Në një postim në Truth Social pasi Departamenti i Drejtësisë shpalli akuzat, Trump tha: “Zyrtari i FBI-së që mu qep pas mua për çështjen e Rusisë. Rusia, Rusia dhe Rusia thoshte, shumë kohë përpara zgjedhjes sime si President, sapo u arrestua për marrjen e parave nga Rusia, Rusia, Rusia. Le të kalbet në ferr!“.
Sa i përket hetimit për Trump në vitin 2019, në konkluzinet e këshilltarit special Robert Mueller u përcaktua se nuk kishte prova që Trump dhe fushata e tij komplotuan ose koordinuan me Rusinë për të ndërhyrë në zgjedhjet e 2016-ës, megjithëse ish-presidenti dhe disa nga zyrtarët e tij mund të kenë tentuar të pengojnë hetimin.
Papadopoulos sakaq u burgos për 12 ditë në 2018 pasi pranoi se kishte gënjyer FBI-në për kontaktin e tij me profesorin me bazë në Londër, Joseph Mifsud, i cili dyshohet se kishte informacione të dëmshme për Clinton gjatë fushatës zgjedhore të 2016-ës.
Deripaska ishte gjithashtu një klient i Paul Manafort, ish-menaxherit të fushatës së Trump, i cili u burgos në vitin 2019 për akuza për mashtrim tatimor dhe bankar në një rast që buronte nga hetimi i Mueller për Rusinë.
Departamenti i Drejtësisë tha se McGonigal dhe Shestakov ishin të vetëdijshëm se komploti për të punuar me Deripaskën shkelte sanksionet e SHBA, veçanërisht pasi McGonigal do të kishte marrë informacion të klasifikuara se Deripaska do të shtohej në një listë të oligarkëve të sanksionuar.
Deripaska u sanksionua nga SHBA në vitin 2018 për lidhjet e tij të dukshme me qeverinë ruse dhe sektorin energjetik të Rusisë në mes të kërcënimeve të vazhdueshme të Moskës ndaj Ukrainës.
Ndërkohë, McGonigal akuzohet për fshehje të fakteve materiale, gjashtë akuza për deklarime të rreme dhe dy akuza për falsifikim të të dhënave dhe dokumenteve.
Ai u deklarua i pafajshëm për akuzat gjatë një paraqitjeje në gjykatë në Nju Jork të hënën.
