Prej 24 orësh arrestimi i zyrtarit të FBI-së Charles McGonigal dhe “dhurata” prej 225 mijë dollarë ndaj tij nga ana e një ish-agjent të sigurimit në Shqipëri, pak ditë pas takimit me kryeministrin Edi Rama në Tiranë, është kryefjala e mediave ndërkombëtare.
Për këtë arsye shefi i qeverisë në Shqipëri, i vendosur në qendër të akuzave për pagesa për lobime te McGonigal dhe raportin miqësor me të, ka reaguar pasditen e sotme.
Në dosjen e drejtësisë amerikane për McGonigal, rezulton se ai është vënë nën akuzë për korrupsion dhe i kanë dalë zbuluar edhe takimet në Tiranë me kreun e qeverisë shqiptare, por për Ramën kjo nuk do të thotë asgjë.
Rama pretendon se akuzat që rëndojnë mbi McGonigal nuk kanë lidhje me të dhe ashtu siç gjithmonë zgjedh të mbulojë skandalet i vëruslet me “cicërimën” e tij në Tëitter kundërshtarëve politikë dhe mediave, të cilët i grupon në seksionin e një ‘big brother kanalesh’ që po i bëjnë gjyqin.
Kreu i ezkekutivit shqiptar ka zgjedhur të mos zbulojë arsyet e takimeve të zhvilluara me ish-agjentin e FBI-së gjatë kohës që ai ka udhëtuar drejt Shqipërisë në vitin 2017, pavarësisht se në dosjen amerikane Rama është paralajmëruar që të ketë kujdes në lidhje me licensat e dhëna kundrejt kompanive ruse për shpimet e naftës në Shqipëri.
“Akuzohet në Amerikë një zyrtar i FBI për gjëra që s’kanë as edhe një lidhje me mua (se po të kishin do t’i kishte nxjerrë hetimi i atyre që nuk manipulojnë prova e as kursejnë fajtorë) dhe në Shqipëri fillon gjyqi ndaj meje në Big Brotherin e politikës, kanaleve e portaleve! Jam mësuar, po së fundmi kam vendosur të mos merrem më me nxjerrjen e çdo guri që hidhet përditë në lumë nga protagonistët e sojsojshëm të këtij Big Brotheri pambarim!
Më pak fjalë dhe akoma më shumë punë e kontakte me njerëzit që kanë punë për të bërë apo punë për të zgjidhur. Duhen kuptuar edhe ata që s’dinë të bëjnë asgjë tjetër, ashtu siç duhen kuptuar edhe ata që s’duan të besojnë asgjë tjetër përveç asaj që duan medoemos të besojnë”, shkruan Rama.
Akuzohet në Amerikë një zyrtar i FBI për gjëra që s’kanë as edhe një lidhje me mua (se po të kishin do t’i kishte nxjerrë hetimi i atyre që nuk manipulojnë prova e as kursejnë fajtorë) dhe në Shqipëri fillon gjyqi ndaj meje në Big Brotherin e politikës, kanaleve e portaleve!
— Edi Rama (@ediramaal) January 24, 2023
Por teksa sot Rama e njeh McGonigal si një zyrtar të FBI-së që ka hesape për të larë më drejtësinë amerikane, vetëm pak kohë më parë në një bashkëbisedim online me qytetarët (kur s’kishin dalë ende në dritë akuzat për pagesat nga Shqipëria) ai e prezantonte atë si mikun e tij të ngushtë dhe e merrte në mbrojtje.
“Shefi i Kundërterrorit i FBI-së ka qenë dhe është miku im nuk diskutohet. Nëse ai ka një çështje të tijën me drejtësinë në SHBA kjo është çështje e tij me drejtësinë atje. lëreni të flasë drejtësia në SHBA. Nuk bëhet drejtësia e nuk nxirren fajtorët e nuk bëhen akuzat në këtë farë feje se është e tmerrshme. Dhe nuk është e tmerrshme për mua sepse nuk kam asnjë problem dhe për sa kohë vijoj në këtë detyrë i kam marrë parasysh dhe pres më shumë se kaq, i pres të gjitha. Por është e tmerrshme për këtë popull për këtë vend, për gjithë ato që ne i konsiderojmë vlera shqiptare e parime e tradita. Çfarë të them më shumë se kaq. Bëhet fjalë për një çështje në SHBA që s’ka asnjë lidhje me mua, me qeverinë shqiptare, biznes të çfarëdollojshëm, me këtë teori i bie që ne nuk duhet të takojmë askënd sepse nesër dikush mund të ketë një problem me drejtësinë në vendin tij. Kjo është çmenduri”, deklaronte Rama.
Sakaq në dosjen e plotë të FBI-së ku renditen shkeljet e kryera nga ish-agjenti i FBI-së në New York, shpjegohen edhe rolet e personave që kanë sjellë McGonigal në Shqipëri dhe e kanë adresuar në zyrën e Ramës.
‘Personi A’ që ka bërë pagesën prej 225 mijë dollar në Nju Xhersi përfaqëson një shqiptar, të lindur në Shqipëri, por të natyralizuar si shtetas amerikan dhe banues në Nju Xhersi. ‘Personi A’ kishte qenë punonjës i një agjencie të inteligjencës shqiptare disa dekada më parë.
‘Kompania A’ është një organizatë biznesi në Delaware e regjistruar nga Personi A në janar 2018.
‘Personi B’ është shtetas shqiptar i punësuar në një konglomerat energjetik kinez. Personi B vepronte si këshilltar jozyrtar i Kryeministrit të Shqipërisë, duke mbajtur një llogari zyrtare emaili dhe pasaportë të qeverisë shqiptare dhe ishte një ish-zyrtar i lartë i qeverisë shqiptare. Personi A dhe personi B ishin miq dhe bashkëpunëtorë biznesi me njëri-tjetrin.
Ndërkohë McGonigal përballet në SHBA me dy akuza, për marrje të parave nga një oligark rus në lidhje me fshirjen e emrit të tij nga lista e sanksioneve të Shteteve të Bashkuara, dhe me një tjetër akuzë në Uashington, në lidhje me vizitat e tij në Shqipëri dhe marrjen e një sasie parash prej 225 mijë euro nga “Personi A”, një punonjës i shërbimit informativ shtetëror.
