Gjykata e Posaçme e Apelit për Korrupsionin dhe Krimin e Organizuar ka liruar nga qelia nënkryetarin e bashkisë së Bashkisë së Lushnjës, Gentian Nushi i cili ësjhtë dënuar me 1.8 vite burg pasi akuzohet për shkelje të barazisë në tendera.
Nushi u arrestua pas një hetimi disa mujor lidhur me procedurat e ndjekura të tenderit të kanalit Bishqthem-Bitaj.
Prokurori konstatoi se Nushi ka ndërhyrë në procedurat e përzgjedhjes së fituesve në këtë tender.
“Gjykata e Posaçme e Apelit për Korrupsionin dhe Krimin e Organizuar me trup gjykues të përbërë nga gjyqtarët Florjan Kalaja kryesues, Igerta Hysi anëtare dhe Dhimitër Lara anëtar, sot më datë 24.01.2023, zhvilloi seancë gjyqësore për çështjen penale nr. 22 akti, datë 23.01.2023 regjistrimi, regjistruar mbi kërkesën e të pandehurit G.N. për konstatimin e shuarjes së masës së sigurimit personal “arrest në burg” dhe vendosi:
– Konstatimin e shuarjes së masës së sigurimit “arrest në burg” të caktuar ndaj të pandehurit z. G.N., me vendimin nr. 101, datë 11.12.2021 të Gjykatës së Posaçme të Shkallës së Parë për Korrupsionin dhe Krimin e Organizuar.
– Urdhërimin e lirimit të menjëhershëm të të pandehurit z. G.N. nga ambientet e paraburgimit nëse liria e tij personale nuk kufizohet për një shkak tjetër ligjor”, thuhet në njoftim.
Mësohet se Gentian Nushi akuzohet për kryerjen e veprës penale të “Shpërdorimit të detyrës” në bashkëpunim dhe “Shkeljes së barazisë së pjesëmarrësve në tendera apo ankande publike”, kryer në bashkëpunim. Kujtojmë se në korrik të vitit të shkuar u arrestua edhe kryetari i Bashkisë Lushnje, Fatos Tushe dhe 10 zyrtarë të tjerë, të akuzuar për “shpërdorim detyre” në bashkëpunim.
