Kodra e Currilave në Durrës thuajse u lëshua mbi rrugën mbi të cilën ngrihet paraditen e sotme, teksa shembja e skarpateve anësore dhe çarja e rrjetave mbrojtëse bëri që dherat të pushtonin aksin që lidh zonën me qytetin e Durrësit.
Teksa kjo duket të jetë një situatë që përsëritet thuajse sa herë ka reshje të dendura shiu, ajo ç’ka del në pah është dështim i Bashkisë së Durrësit për të rehabilituar hapësirën në fjalë.
Kjo jo sepse fondet për një investim që do të pengonte rrëshqitjen e dherave prej saj kanë munguar, por sepse me shumë gjasë janë shpërdoruar me një tender abuziv e korruptiv të realizuar në kohën e Vangjush Dakos.
Një projekt me investim mbi 1 milion dollarë u krye në këtë zonë në verën e vitit 2015, por deri më tani ka rezultuar shpenzim i kotë, pasi balta dhe dherat bllokojnë aksin Currila-Durrës thuajse çdo dimër.
Madje pak para fushatës elektorale asokohe, Rama e reklamoi investimin aty në krah të Dakos duke thënë se mjaftonte për të eliminuar për një kohë të gjatë problemet.
“Falë kësaj ndërhyrjeje të qeverisë shqiptare, këtu kemi një transformim rrënjësor, janë mbjellë 50 mijë fidanë dhe brenda një harku 2-3 vjeçar do të kemi një pamje të transformuar të një kodre të gjelbëruar dhe një larmi bimësie, që do të jetë vërtet një atraksion i rëndësishëm për të gjithë ata që do të shfrytëzojnë vijën e shëtitjes në ajër të pastër”, tha kryeministri në atë kohë.
Por, fiks pas 7 vitesh fjalët e Ramës janë “përhumbur” në masën e baltës argjilore që mbërriti deri në rrugë, si pasojë e erozionit të tokës në Kodrën e Currilave, duke e kthyer veprën edhe në një objekt denoncimi nga opozita.
Ishte sekretarja për Marrëdhëniet me Publikun në PD, Jola Hysaj e cila foli nga zona e Currilave për aferën korruptive në realizimin e punëve publike, pyeti se ku janë 50 mijë fidanët që dyshja Rama-Dako premtuan dhe pse Prokuroria nuk heton tenderin 1 milionë dollarë, punimet për të cilin nuk kanë rezultuar efektive.
Deklarata e PD:
Ndërkohë që Kodra e Currilave vazhdon të degradojë sa herë që ka reshje shiu, qofshin këto të vogla apo të mëdha, gjithmonë e më shumë arrijmë të kuptojmë investimet sipërfaqësore të qeverisë dhe abuzimet që janë bërë dhe bëhen me qytetin e Durrësit.
Tashmë arrijmë të kuptojmë qartazi aferën korruptive në Prill 2015, ku vetëm, pak javë para zgjedhjeve lokale, kryeministri Edi Rama u shfaq në krah të njeriut të tij të besuar, Vangjush Dakos për të bindur durrsakët se kishte ardhur fundi i rrëshqitjeve në zonën e Kodrës së Currilave.
Premtimet se investimi në këtë zonë do të eliminonte për një kohë të gjatë problemet në te po e tregojnë vit pas viti që nga 2015, që janë premtime boshe dhe abuzive.
Disa nga pikëpyetjet për këtë projekt:
- Ku janë janë 50 mijë fidanë që u premtuan se do te mbilleshin ?
- Ku është pamja e transformuar e një kodre të gjelbëruar me një larmi bimësie, qe do te ndodhte brenda një harku 2-3 vjeçar “?
- Cili është atraksion i rëndësishëm qe u premtua për të gjithë ata që do të shfrytëzojnë vijën e shëtitjes në ajër të pastër.?
- A kane studime te mirëfillta gjeologjike lejet e ndërtimit e dhëna në Kodrën e Currilave dhe Kodër Vilë?
- Bashkia e Durrësit me detyrën e saj funksionale te mirëmbajtjes jo vetëm të zonës por dhe mirëmbajtjen e se ashtuquajturit projekt i cili do te sillte si risi dhe shëtitoren ndërmjet Kodrës së Currilave dhe Kodër Vilës… Kjo e fundit e tej mbushur me leje ndërtimi pa kriter.
Ky investim i dështuar 2 milion dollarësh në Kodër-Currila tregon qartë se fsheh aferën korruptive në realizimin e punëve publike në Durrës.
Por, pavarësisht këtij fakti, ende nuk është bërë asnjë ndjekje penale nga Prokuroria e Durrësit apo të ketë nisur ndonjë hetim për dëmin financiar të shkaktuar nga zbatuesit e projektit, Bashkia Durrës.
