Deputetja e Partisë së Lirisë, Monika Kryemadhi, ka folur për rikthimin e çështjes së “21 Janarit” në vëmendjen e mediave, pas publikimit të një materiali audio, ky pretendohet se shfaqet komunikimi me radio i ish komandatit të Gardës që urdhëron vartësit të bëhen gati për zjarr.
Në emisionin “Të Paekspozuarit” në MCN TV, Kryemadhi tha se çdo çështje që mbetet e paqartë duhet hetuar, por shtoi se riaktivizimin e kësaj çështje e sheh si “konsum mediatik” me qëllimin që të heqë vëmendjen nga afera e inceneratorëve, të cilën ajo e ka denoncuar vazhdimisht.
“Për mua, çdo çështje që është e paqartë duhet të hetohet. Pavarësisht se mendoj, se çështja e hedhur sot për konsum, është largimi i vëmendjes nga inceneratorët. Është për konsum mediatik. Sponsori kryesor i kësaj është Edi Rama. Mos harrojmë rastin e arrestimit të ish drejtorit të FBI që e lidh me çështjen e financimeve ruse. Ka lidhje dhe me pagesa të bëra nga Shqipëria”, tha Kryemadhi.
