Pjesëmarrja dhe deklaratat nga forumi ekonomik i liderëve botërorë në Davos duket se ka nxehur sërish gjakrat duke provokuar tension midis Turqisë dhe Greqisë.
Është presidenti turk Rexhep Taip Erdogan ai që ka hapur një përplasje të re në vetëm pak orë duke vendosur theksin te kërkesa për demilitarizimin e ishujve.
“Çfarë do të bëjë Turqia, do të rrijë duarkryq?“, pyeti me tone kërcënues Erdogan në një referencë të re për raketat “Tayfun” që Ankaraja po prodhon.
Presidenti turk nuk u kursye aspak madje duke iu drejtuar edhe kryeministrit grek Kyriakos Mitsotakis duke i thënë: “Shiko Mitsotakis, ti po flet aty-këtu. Ki parasysh se turqit e çmendur do të vijnë nëse përpiqesh të bësh ndonjë gabim“.
Në të njëjtën kohë, teksa fliste për raketën “Tayfun”, Erdogan tha: “Në Greqi thonë ‘Turqia ndërtoi një raketë që e quajnë Tayfun. Çfarë do të ndodhë nëse ajo godet Athinën me të?’ Ne nuk e kemi problem, ju duhet të tregoheni të zgjuar”.
Referenca e veçantë për kryeministrin vjen pak orë pas intervistës së Kyriakos Mitsotakis me gazetarin e njohur të CNN, Farid Zakaria, në Forumin Ekonomik të Davosit.
Duke komentuar zhvillimet greko-turke, Mitsotakis tha se “ne nuk do të hyjmë në luftë me Turqinë, por në tre vitet e fundit kemi përjetuar shumë tensione dhe jo vetëm për Kastellorizon”.
“Ne duhet të jemi në gjendje të ulemi me Turqinë si të rritur të arsyeshëm dhe të diskutojmë çështjen e shelfit kontinental dhe zonave detare në Egje. E bëmë me sukses me Italinë dhe Egjiptin, me Shqipërinë do ta çojmë çështjen në Hagë dhe ajo do të vendosë”, nënvizoi ai.
Ndërkohë më herët, Erdogan nuk e fshehu acarimin e tij me revistën “The Economist”, e cila në botimin e fundit e cilëson atë si një “ngacmues” që “po e çon Turqinë drejt diktaturës”.
Pas namazit të xhumasë, presidenti turk tha për “The Economist”: “A mund ta përcaktojë revista britanike fatin e Turqisë? Kombi im është ai që e përcakton atë. Ajo që thotë kombi im do të përcaktojë se çfarë do të ndodhë në Turqi”.
Ndërsa, duke komentuar pajisjet e reja ushtarake të Greqisë, Erdogan deklaroi: “Me pajisjet ushtrake të ishujve, po ndërmarrin hapa të kundërt në lidhje me Traktatin e Lozanës dhe marrëveshje të tjera. Ajo që deklaron Mitsotakis nuk mjafton për të përcaktuar fatin e rajonit. Ne po bëjmë atë që duhet dhe do të themi atë që duhet në takimet ndërkombëtare, grekët le të kujdesen për veten e tyre”.
