Banka e Shqipërisë ka pezulluar licencën e institucionit financiar jobankë të kredidhënies Micro Credit Albania (MCA).
Banka qendrore ka vlerësuar se subjekti në fjalë ka vepruar në shkelje të kërkesave rregullatore për një kohë të gjatë, në mënyrë të vetëdijshme dhe duke favorizuar palët e lidhura, më konkretisht institucionin tjetër financiar, Final.
Pas një kontrolli në korrik të 2020 pranë subjektit në të cilin u evidentuan shkeljet shoqëria financiare Micro Credit mori masa për korrigjimin e situatës. Por në një kontroll të dytë në Shtator të vitit 2022, Departamenti i Mbikëqyrjes vuri re që masat ishin zbatuar pjesërisht duke konstatuar këto shkelje:
“Subjekti nuk i ka klasifikuar kreditë në përputhje me rregulloren, nuk i ka klasifikuar të gjitha ekspozimet e një klienti në të njëjtën kategori rreziku, subjekti nuk ka kryer një analizë të plotë financiare mbi aftësinë e paguese por është bazuar në vetdeklarime të paverifikuara, subjekti nuk ka një databazë me të dhëna të plota dhe të përditësuara për të gjithë klientët e tij” shkruhet në vendimin e BSH.
Departamenti i Mbikëqyrjes, në përputhje me legjislacionin vlerësoi rrethanat e shkeljeve dhe pasojat. Subjekti Microcredit ka vepruar në mënyrë të përsëritur të shkeljeve të kërkesave rregullatore për një kohë të gjatë duke favorizuar palët e lidhura dhe ka paraqitur përpara autoritetit mbikëqyrës një situatë joreale të cilësisë së portofolit të kredisë. Subjekti nuk ka respektuar kërkesat rregullatore lidhur me kufizimin e masës së penaliteteve.
Micro Credit Albania është një institucion financiar jobankë i licencuar në vitin 2016, në shërbimin e kredive për bizneset dhe qytetarët.
