Me reformën në drejtësi dhe korrupsionin si armë beteje mbi supe, Edi Rama iu vërsul me “spatë të madhe” Bashkimit Europian në Forumin Ekonomik të Davosit, duke mos kursyer kritikat e përsëritura për mungesë të vëmendjes dhe ndihmës financiare për Shqipërinë e vendet e tjera të Ballkanit Perëndimor.
Referuar pikërisht reformës dhe luftës kundër korrupsionit, Rama shprehu habinë për mënyrën sesi BE ka reaguar ndaj qeverisë së tij, duke mos e pëlqyer punën e kryer.
Duke mos e kursyer aspak ironinë, Rama iu referua vendeve të BE si “Perënditë” që një vend i vogël si Shqipëria i dëgjoi duke aplikuar fshesën në drejtësi, por iu faturoi edhe kaosin e krijuar me sistemin gjyqësor, ku mijëra dosje mbetën stok prej përjashtimit në masë të gjerë të togave të zeza nga vetting.
“Na u kërkua, apo donim të bënim dhe u mbështetem shumë dhe natyrisht na u kërkua shumë që të bënim nje proces fshese të gjithë sistemit nga gjyqtarët dhe prokurorët e korruptuar dhe siç bëjmë gjithmonë, hymë me besim të plotë, krenari të plotë sepse po bëjmë diçka që perënditë tona europiane do ta duan e do ta mbështesin. Pa merreni me mend pak, fshesa ishte kaq radikale sa që befas mbetëm pa Gjykatë Kushtetuese. 9 nga 11 gjyqtarë u fshinë sepse nuk justifikonin pasurinë e tyre. Ne menduam që europianët do ta admironin këtë por na thanë: “ju nuk keni një Gjykatë Kushtetuese”. Kështu që u bë problemi ynë kryesor” – tha Rama.
E si për ta vulosur listën e tij të kriktikave, Rama u kap pas skandalit korruptiv “KataGate” që ka mbërthyer Parlamentin Europian dhe ka për protagonist eurodeputeten greke Eva Kaili.
Duke e parë në sy Presidenten e PE, Roberta Mestola, një nga 14 zëvendëset e së cilës u “zhyt” në llumin e milionave nga Katari, Rama denjoi edhe t’i thoshte se Bashkimi Europian sapo u godit nga “karma” me shprehjen ikonike: “Karma është kurv*ë”.
“Në qoftë se do t’u rezervonin të njëjtin trajtim vetë shteteve anëtare, duhet t’iu them dhe nuk po them Malta, por më shumë se gjysma e shteteve anëtare të Bashkimit europian nuk do ta kishin më të mundur të hyjnë në Bashkim Europian ,do ta kishte të pamundur. Nuk flasim për shtete ish-komuniste, por flas dhe për themeluesit, më besoni. Ky është realiteti, por për ne, për mua dhe kjo nuk është shaka, BE-ja është destinacioni i vetëm. Çfarëdo që të kërkojë, edhe nëse nuk mbërrijmë kurrë aty, ajo çfarë është e rëndësishme është që të kemi një shtet të ngjashëm me BE-në, me institucione të mirëfillta, me llogaridhënie të mirëfilltë, e kështu me radhë. Por, Roberta ndjesë, më duhet ta them. Kur doli kjo çështja e korrupsionit tek ju, thashë që “Karma is a bitch””, tha Rama.
E si për t’i treguar Europës që pavarësisht gjithçkaje Shqipëria do t’i qëndrojë besnike, Rama luajti kartën ruse, duke kujtuar aggresionin e treguar nga Vladimir Putin në Ukrainë dhe dëshirën e Kremlinit për të “mbërhyer në grackë” edhe Ballkanin Perëndimor.
“Putini në disa vende po shihet si hero, por jo në Shqipëri, sepse në Shqipëri realiteti është ndryshe. Unë dhe presidenti serb kemi një mosmarrëveshje shumë të madhe lidhur me atë që ai e quan pjesë të Serbisë dhe unë e quaj shteti i lirë i Kosovës. Ka shumë kritika ndaj Angela Merkelit dhe politikanëve që morën gazin rus dhe po e zëvendësojnë atë. Mënyra sesi e shikoj unë botën është se nuk po e zëvendësojnë gazin nga burimet e pista ruse nga vende “shumë demokratike” dhe të pastra. Ne të gjithë në Ballkanin Perëndimor jemi në një front, kur vjen puna për të dënuar Rusinë, përfshi Serbinë. Nuk i përkasim klubit të madh të vendeve të Ballkanit Perëndimorë që për përjetojmë këtë rënie të imazhit të BE-së. Çfarë do të ndodhë, ne do i mbetemi krahë BE-së. Ne i qëndrojmë besnik perandorive. Edhe nëse BE do të zhduket ne aty do të jemi. Ne aty do të jemi. Ju qeshni, pas shumë ditëve depresive ju takon të qeshni”, është shprehur Rama.
