Gjykata Kushtetuese ka përfunduar shqyrtimin e kërkesës së Partisë Demokratike, që kërkon heqjen e mandatit të deputetes për Olta Xhaçkën.
Sipas PD, bashkëshorti i ministres, Artan Gaçi ka përfituar të drejta pasurore mbi pasuri shtetërore – një kompani e Gaçit ka fituar statusin e investitorit strategjik dhe të drejtën e shfrytëzimit të një sipërfaqe plazhi në bregdetin e jugut – dhe në këtë formë përfitimet e Gaçit konsiderohen si përfitime dhe të vetë ministres. Kështu, sipas PD, Xhaçka është në konflikt interesi dhe duhet të shkarkohet si deputete e Kuvendit.
Në seancën e sotme, palët parashtruan argumentet e tyre me PD. Në përfundim të saj, deputetë të Partisë Demokratike mbajtën një deklaratë për mediat, duke u shprehur se gjykata i ka tashmë të gjitha provat për t’i hequr mandatin ministres Olta Xhaçka.
“Është shumë e qartë, zonja Xhaçka ministre e Jashtme ka përfituar nga prona publike. E ka bërë këtë duke përdorur bashkëshortin dhe kunatën. Sot avokati i Xhaçkës, pranoi vetë që shtetasja e huaj që ka marrë statusin e investitorit strategjik për të fshehur bashkëshortin e Xhaçkës, është kunata e zonjës Xhaçka. Kështu që vendimi në gjykimin tonë është shumë i thjeshtë. Ne besojmë se Gjykata Kushtetuese, ka krijuar një precedent, standard, atë që të heqë mandatin e deputetëve nëse këta përfitojnë nga prona publike. Jemi të bindur që ka vetëm një mundësi përballë këtij abuzimi dhe akti korruptiv, përndryshe do të ishte realisht një dëm shumë i madh për besueshmërinë e kësaj gjykate që me vendimin e saj do ta nxirrte të larë deputeten Xhaçka”, tha deputeti Agron Shehaj.
Argumentin e mbrojtjes ligjore të Xhaçkës, se kërkesa e PD duhet rrëzuar pasi është dorëzuar në gjykatë jashtë afateve ligjore të përcaktuara nga ligji, ai e quajti justifikim.
“Nëse vendimi dhe nëse Gjykata do të jetë e drejtë, nuk ka asnjë arsye dhe i ka të gjitha provat për të marrë vendimin e duhur. Nëse ka një vendim tjetër që është marrë, ka justifikime, pretekste sa të duam dhe sa të duan për ta marrë atë vendim”, deklaroi deputeti.
Deputeti tjetër demokrat Bylykbashi i mëshoi argumentit se “Gjykata Kushtetuese tashmë e ka vendosur standardin për përfitime më të vogla se kaq”.
“Kushtetuta e Republikës së Shqipërisë ka një dispozitë shumë të qartë, nenin 70 pika 3 në mbrojtje të interesit publik. Askush, asnjë prej deputetëve nuk mundet që të ushtrojë një aktivitet fitimprurës me pasurinë e shtetit, apo të përfitojë nga pasuria e shtetit. Dhe sanksioni për këtë është humbja e mandatit të deputetit. Gjykata Kushtetuese tashmë e ka vendosur standardin për përfitime më të vogla se kaq. Dy deputetë të Republikës së Shqipërisë në të shkuarën kanë humbur mandatin. E themi dhe njëherë, është i vetmi sanksion që ka Kushtetuta në raport me dispozitat e tjera, dhe është një sanksion dhe dispozitë e rrallë në kushtetutat e ndryshme. Dhe kjo nga kushtetutë bërësit është bërë në mënyrë të qëllimshme, për të parandaluar që deputetët apo pushtetmbajtësit të ushtrojnë pushtetin duke u pasuruar në dëm të interesit dhe pasurisë publike”, tha Bylykbashi.
“E thashë që precedenti është vendosur. Nëse sot do të bjerë ky precedent dhe qeveria me presionin që ka ushtruar deri në këto momente, do të arrijnë ta zhbëjnë këtë pikën 3 të nenit 70, të 140 bashkëshortët apo bashkëshortet e deputetëve, apo ministrave do të kenë mundësinë të ushtrojnë nëpërmjet kamuflimit, marrëveshjeve të simulimit, krijimit të kompanive fiktive dhe të ushtrojnë pushtetin në mënyrë të tillë, që të hyjnë të varfër në pushtet dhe të dalin të pasur. Kjo është e papranueshme dhe sot është sigurisht detyra, nderi dhe përgjegjësia e Gjykatës Kushtetuese të mbrojë interesin publik. Ne këtu nuk kemi ardhë për një çështje të PD-së, jemi në mbrojtje të interesit publik dhe gardiani i fundit për këtë është Gjykata Kushtetuese”, shtoi ai.
Më herët gjatë ditës, Kushtetuesja shqyrtoi një kërkesë të ngjashme të grupit Alibeaj, që po ashtu kërkonte shkarkimin e Xhaçkës si deputete.
Vendimi nga gjykata pritet të shpallet brenda 30 ditëve.
