Gjykata Kushtetuese ka shqyrtuar sot kërkesën e “grupit Alibeaj” që kërkon heqjen e mandatit të deputetes për Olta Xhaçkën.
Seanca e nisur në orën 10:00 është mbyllur në orën 13:20, ndërsa Gjykata Kushtetuese pas dëgjimit të pretendimeve nga palët, u tërhoq për vendim.
Vendimi pritet të shpallet brenda 30 ditëve.
Sipas opozitës, bashkëshorti i Xhaçkës ka përfituar nga qeveria statusin e investitorit strategjik, deputetja ndodhet në kushtet e konfliktit të interesit dhe i duhet hequr mandati.
Nga ana tjetër, Xhaçka ka mohuar akuzat.
Përfaqësuesi ligjor i “grupit Alibeaj”, Marash Logu ka paraqitur në gjykatë argumentet se pse Xhaçka duhet të shkarkohet si deputete. Logu argumentoi se Xhaçka përfiton direkt nga statusi investitor strategjik i Artan Gaçit për shkak të lidhjes martesore që të dy kanë.
Nga ana tjetër, mbrojtësi ligjor i Ministres së Jashtme, Genc Çifligu ka deklaruar se kjo kërkesë duhet rrëzuar pasi është dorëzuar jashtë afateve ligjore të përcaktuara nga ligji. Sipas avokatit, kërkesa duhet të dërgohej brenda 3 muajve nga momenti ku kontatohet papajtueshmëria e mandatit. Si afat kohor për këtë, tha se është marsi i vitit 2022, kur bashkëshorti i Xhaçkës mori statusin e investitorit strategjik. Po ashtu, ai tha se Xhaçka nuk ka përfituar fonde publike.
Edhe përfaqësuesi ligjor i Kuvendit, Erind Mërkuri, i ka kërkuar Gjykatës Kushtetuese që të rrëzojë kërkesën e deputetëve të opozitës për heqjen e mandatit të deputetes së Partisë Socialiste. Në fjalën e tij gjatë seancës, Mërkuri tha se veprimet e familjarëve nuk mund të përfshihem tek veprimet e deputetit dhe ndaj sipas tij kërkesa duhet të rrëzohet.
Ndërkohë, Kushtetuesja ka nisur të shqyrtojë edhe padinë e PD-së, në të cilën gjithashtu kërkohet që Xhaçkës ti hiqet mandati i deputetes për shkak se bashkëshorti i saj ka përfituar pasuri publike me shpalljen si investitor strategjik nga qeveria. Sipas PD, Xhaçka ndodhet në kushtet e shkeljes së ligjit për parandalimin e konfliktit të interesit.
