Mister fati i Mateo Likës, rinisin kërkimet për 26 vjeçarin

Mateo Lika, 26 vjeç, dyshohet se teksa po kthehej nga Gjermania, është përplasur me parmakët e Urës së Mbrostarit dhe më pas ka rënë në lumin e Semanit.

Duke qenë se nuk ka patur asnjë denoncim për persona të tjerë të zhdukur, mendohet se 26 vjeçari ka qenë i vetëm në makinë. Që prej katër ditësh, Mateo Lika nuk përgjigjet në telefon edhe pse familjarët e tij kanë tentuar ta kontaktojnë.

Ndërkohë, kërkimet për gjetjen e tij vështirësohen pasi makina që kishte marrë me qera nuk ishte e pajisur me GPS dhe kamerat e sigurisë nuk kanë një pamje të qartë të lëvizjes së të riut.

Deri më tani, është gjetur vetëm targa e automjetit të marrë me qera.

Policia ka marrë në pyetje të afërmit e Mateo Likës për të mësuar lëvizjet e tij para se të zhdukej.