Alban Xhaferi mendon se Vllaznia i ka kthyer reston Partizanit pas fitores së fundit, duke iu referuar këtu humbjes në ndeshjen e fazës së parë në Shkodër. Së fundmi presidenti i kuqebluve ka folur për vazhdimësinë dhe për afrimin e bujshëm të sulmuesit Bekim Balaj, i cili rikthehet në Shkodër pas 13 vitesh.
Përmbysja ndaj Partizanit- Partizanit i kthyem borxhin. Sigurisht që më gëzon fitorja. Por dua të them që kampionati është i gjatë dhe duhet që të marrim gjërat me radhë. Partizani nuk është pa meritë në krye, por ne kemi objektivat tona.
Objektivi i titullit- Ne që në fillim të sezonit e kemi si objektiv titullin kampion dhe do të vazhdojmë të mendojmë deri në fund, pra deri sa të na lejojë matematika për titullin kampion. Fillimi i vitit 2023 ishte i mirë dhe shpresoj që të jetë viti ynë për të arritur objektivat.
Firma me Bekim Balajn – “Ne kemi negociuar me Bekimin në fakt edhe vitin e kaluar, por nuk ishte momenti. Megjithatë, këtë vit bëmë shumë negociata dhe arritëm një rezultat pozitiv në të dyja anët, ku firmosëm këtë marrëveshje, që mendoj se është një diçka shumë e mirë për klubin e Vllaznisë, duke pasur parasysh emrin e tij, por edhe eksperiencën e tij. Më vjen mirë që tani është me ne, sepse mbi të gjitha Bekimi është një djalë i shkëlqyer, i cili është edhe emocionalisht i lidhur me qytetin dhe besoj se është një goditje e zgjuar nga ne.”
Merkato e Vllaznisë – Merkatoja është hyrje-dalje. Në fakt, për afrimet e tjera nuk mund të flas, sepse jemi akoma në negociata. Merkatoja akoma nuk është mbyllur.
Kështu që kam dëshirë t’i lëmë gjërat konfidenciale, sepse nuk parapëlqej të flas një diçka që ne jemi në proces negociatash me gjithsecilin futbollist që potencialisht mund të vijnë ose ndoshta mund të ketë edhe largime./Panoramasport
