Një person është arrestuar lidhur me plagosjen e ndodhur paraditen e djeshme në Fier, ku një 50-vjeçar u qëllua me armë zjarri.
“Në vijim të veprimeve për ngjarjen e ndodhur ditën e djeshme, në lagjen ‘11 janari’, ku mbeti i plagosur me armë zjarri shtetasi Dashmir Muça, 50 vjeç, specialistët për Hetimin e Krimeve të Rënda të DVP Fier arrestuan në flagrancë shtetasin Bejo Hoxhaj, 49 vjeç, banues në Mallakastër, për veprën penale ‘Përkrahja e autorit të krimit’”, njoftoi polcia.
Nga hetimet ka rezultuar se i arrestuari ka ndihmuar autorin e ngjarjes, shtetasin Altin Nika alias M. V., 52 vjeç, të largohej nga vendi i ngjarjes.
Në cilësinë e provës materiale u sekuestruan automjeti me të cilin është larguar autori, brenda të cilit u gjetën 1 armë zjarri pistoletë, 1 krehër, 12 fishekë dhe 1 pistoletë paralizuese.
Ndërkohë, 52-vjeçari është ende në arrati.
