Përgjimi ambiental në një dhomë izolimi në Drejtorinë e Policisë së Tiranës, ku ndodheshin së bashku Rozeta dhe Havier Dobi, të akuzuar për grabitjen në banesën e zyrtares Alda Klosi, ka çuar në zbulimin e shumës prej 404 mijë euro në tubat e aspirimit të shtëpisë së tyre.
Detaje nga ky përgjim janë zbardhur nga BË, dhe ajo çka bie në sy është fakti se pastruesja i ka komunikuar të birit se do t’a merrte ajo përsipër fajin, ndërsa ai me kodin “lekët atje lart” ka “fundosur” nënën dhe veten pasi i ka dhënë indicie hetuesve për një kontroll të dytë në banesën e tyre.
Gjithashtu Rozeta Dobi ka zgjedhur qelinë për të kritikuar të birin, duke i thënë se ka prishur shumë para, ndërsa ai shprehet se ka marrë vetëm 50 mijë euro.
PËRGJIMI:
Havieri: Çfarë ke thënë ti për mu?
Nëna: Asgjë, do rri unë këtu (Nënkupton se do ta marrë ajo përsipër vjedhjen)
Havieri: Lekët atje lart të shtëpia do ti nxjerr unë. (Bazuar në këtë fjali është urdhëruar kontroll i dytë ku u gjetën paratë e tjera në tubin e aspirimit)
Po ashtu në përgjime dëgjohet se më pas Rozeta kritikon të birin se pse ka tërhequr shumë para.
Ndërkohë që Havieri i përgjigjet duke thënë: Kam tërhequr vetëm 50 mijë (duke nënkuptuar euro).
