Nga Boldnews.al
Erion Veliaj vijon të “joshë” cilindo person me një peshë të caktuar para zgjedhjeve lokale të majit 2023. Dalja e opozitës së bashkuar me një kandidat të vetëm ka sjellë mobilizimin e Lali Erit, i cili po tenton që të marrë pas vetes emra nga mazhoranca apo edhe persona që dikur i kanë shërbyer edhe rivalëve. Por, jo me para’ nga Partia Socialiste, por me paratë e taksave të qytetarëve të Tiranës.
Redaksia e BoldNews.al ka siguruar dokumentet e një tenderi që ka kryer Bashkia e Tiranës, ku fitues ka dalë kompania e z. Ermal Beqiri. Ky emër lidhet ngushtë me video përgjimin “Meta – Prifti”, pasi ka qenë ekspert në Gjykatën e Lartë, madje ishte një nga ekspertët që “rrëzoi” autenticitetin e këtij video-përgjimi. Por, pas 2013-ës Beqiri ka mbajtur edhe poste publike si në Hipotekë apo edhe në Ministrinë e Drejtësisë.
Sipas dokumenteve që disponon BoldNews.al, Bashkia e Tiranës ka shpallur në datën 4 janar 2023 fituesin e një tenderi për riorganizimin e këtij institucioni.
Firma fituese është “SOFT & SOLUTION”, ndërsa objekti i tenderit është “përmirësime, riorganizime, integrime e zhvillime te reja të platformës zyrtare në institucion”. Në këtë procedurë kanë marrë pjesë dy firma, përkatësisht shoqëria “INSTANT.AL” me një vlerë 6.500.136 lekë të rinj pa TVSH. Dhe e dyta, firma “SOFT & SOLUTION”, me një vlerë dukshëm më të lartë prej 7.313.579 lekë pa TVSH. Pra, rreth 800 mijë lekë të rinj më shumë sesa oferta më e ulët.
Por, më pas ka vepruar metoda e përjashtimit, pasi firma që ka ofruar më pak është s’kualifikuar. Në dokument jepen të dhëna teknike se firma që ofroi më pak të ketë staf të certifikuar sipas kërkesave. Natyrisht, eksperti i videos apo edhe i vendimmarrjeve në Hipotekë apo në Ministrinë e Drejtësisë duhet t’i ketë të gjitha certifikimet!
Sipas ekstraktit të QKB-së, firma “SOFT & SOLUTION” është thelemuar në datën 28 janar 2011, disa ditë pas vrasjeve në boulevard. Në atë kohë, mazhoranca e sotme protestoi pas videos “Meta-Prifti”, ndërsa procesi vijoi në Gjykatën e Lartë. Një ndër ekspertët është edhe Ermal Beqiri, pronar me 100 % të aksioneve të “SOFT & SOLUTION”, i cili do të dilte në konkluzionin se “në orën e dorëzuar nuk kanë gjetur asnjë gjurmë të video-përgjimit origjinal, mundësia për ndërhyrje në videon e bisedës është e madhe…”.
Ndërkohë, që pas vitit 2013 kur PS-ja erdhi në pushtet, Beqiri punoi në disa institucione dhe së fundmi i është future “me kokë” firmës, teksa vitet e fundit po fiton një serë tenderash me vlera të mëdha, kësaj here edhe nga “kundërshtarët”!
