Përplasja brenda Partisë Demokratike vijon teksa zgjedhjet lokale afrohen. Pasi palët dështuan në bisedime për të dalë me një kandiat të përbashkët në zgjedhjet lokale, këtë të Martë, Enkelejd Alibeaj duket se ka hedhur një tjetër “dorashkë sfide” ndaj palës tjetër, teksa mbështetja ndaj tij tkurret.
Alibeaj merr rolin e drejtuesit të PD-së dhe njofton “pezullimin” e katër deputetëve nga Partia Demokratike. Bëhet fjalë për Tritan Shehun; Oerd Bylykbashin; Belind Këllicin dhe Agron Shehajn. Të katërt janë pozicionuar krah kryetarit të Partisë Demokratike, Sali Berisha.
Sipas njoftimit të zyrës së shtypit pranë Alibeajt, vendimi vjen pasi ka përfunduar afati 1-vjeçar për distancimin publik nga aktet e dhunës në protestën që u zhvillua në PD, më 8 janar të vitit të shkuar.
“Sot, më datë 10.01.2023, ka përfunduar afati 1-vjecar për distancimin e plotë dhe publik nga aktet e dhunës ndaj Partisë Demokratike të deputetëve të pezulluar Tritan Shehu; Oerd Bylykbashi; Belind Këllici dhe Agron Shehaj. Në mungesë të aktit të distancimit, sipas vendimit nr.1 dhe nr. 1/1, datë 10.01.2022 të Kryesisë së Partisë dhe konfirmimit të Këshillit Kombëtar dhe Grupit Parlamentar të Partisë Demokratike në mbledhjen e datës 15.01.2022, nga sot hyn në fuqi masa e largimit zyrtarisht të tyre nga Grupi Parlamentar”, njofton zyra e shtypit pranë Alibeajt.
“Për këtë qëllim, është njoftuar zyrtarisht Kuvendi i Shqipërisë (që njeh ende Enkelejd Alibeajn si kreun e grupit parlamentar të Partisë Demokratike) që deputetët Tritan Shehu; Oerd Bylykbashi; Belind Këllici dhe Agron Shehaj nuk janë më pjesë e Grupit Parlamentar të Partisë Demokratike duke filluar nga data 11.01.2023”, thuhet më tej në njoftim.
Çfarë fshihet pas vendimit?
Por ky argument, me sa duket, ka qenë vetëm një justifikim për Alibeajn, për të cilin mësohet se deputetët demokratë pritet të kërkojnë nga Kuvendi shkarkimin e tij si kreu i grupit parlamentar demokrat.
Burime pranë PD bëjnë me dije se ky vendim i Alibeajt ka ardhur në një kohë kur ka nisur mbledhja e firmave për shkarkimin e tij si kryetar grupi dhe zgjedhjen në këtë post të Ervin Salianjit.
Të njëjtat burime shtuan se pritet një bashkim votash të pjesës dërrmuese të deputetëve të dy kampeve në grupin parlamentar të PD për të shkarkuar Alibeajn si kryetar grupi dhe zëvendësimin e tij me Ervin Salianjin.
Në këto kushte, ndoshta për llogaritje matematikore, Alibeaj vendosi përjashtimin e 4 deputetëve.
Lexo edhe:
Përjashtimi i 4 deputetëve nga grupi i PD/ Açka kundër Alibeajt: A jeni në metro?
Alibeaj e përjashtoi nga grupi parlamentar/ Shehu: I ka bërë keq gjeli vitit të ri
