Një arsenal armësh janë gjetur në bagazhin e një automjeti që drejtohej nga një 36-vjeçar këtë pasdite në aksin Milot-Lezhë.
Ndërkohë, 36-vjeçari që i mbante në automjet ndërkohë që qarkullonte në qytetin e Lezhës, është arrestuar.
Ai është Antonio Leka, i cili u vu në pranga për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Prodhimi dhe shitja e lëndëve narkotike”, “Prodhimi, mbajtja, blerja apo shitja pa leje e armëve të ftohta” dhe “Përgatitja e kushteve për vrasje”.
Arrestimi
Sipas policisë, Antonio Leka u ndalua në një aksion të forcave lokale në bashkëpunim me “Shqiponjat”, që erdhi “në bazë të informacioneve të siguruara nga inteligjenca policore dhe nga familjarët e një 36-vjeçari që po qarkullonte në qytetin e Lezhës, me një automjet në të cilin mbante armë zjarri të llojeve të ndryshme, me të cilat kishte paralajmëruar se do kryente një krim të rëndë”.
Gjatë kontrollit të ushtruar në automjetin e tij, policia gjeti dhe sekuestroinë cilësinë e provës materiale: 1 armë zjarri pistoletë me 5 karikatorë, 1 automatik me 5 karikatorë, 550 fishekë luftarakë për pistoletën dhe automatikun, 1 palë dylbi, 1 antiplumb ushtarak, 1 thikë, 1 çantë ushtarake, 75 gramë lëndë e dyshuar narkotike kanabis dhe rroba kamuflazhi.
“Do vras politikanët”
Alarmin në polici e dha vëllai i 36-vjeçarit, i cili e kishte parë këtë të fundit të veshur ushtarak dhe me anti-plumb.
Pas marrjes së informacionit, Policia lokalizoi dhe ndaloi Antonio Lekën në aksin rrugor Milot-Lezhë.
Gjatë momentit të arrestimit Antonio Leka, nuk ka shfaqur rezistencë ndaj punonjësve të policisë, por u ka thënë këtyre të fundit se ishte nisur në drejtim të Lezhës, për të vrarë politikanët.
“…Do vras politikanët e Lezhës, dhe të zhduk farën e keqe të tyre…” – ka deklaruar Leka, sipas burimeve policore.
Dosja hetimore i ka kaluar prokurorisë së Lezhës, ndërsa në ditët në vijim pritet që 36-vjeçari të dalë para gjykatës së rrethit, për tu njohur me masën e sigurisë.
Antonio Leka është djali i një oficerje ushtrie.
Sipas disa raportimeve mediatike, kjo e fundit ka deklaruar se armët janë të sajat dhe se i dispononte për shkak të detyrës.
