“Bordi i Transparencës, mund të shkrihet”. Kjo është përgjigja e ministres së infrastrukturës Belinda Balluku, e pyetur nëse duhet të ekzistojë më bordi i Transparencës për çmimet e karburanteve. Sipas Ballukut vendimi për të hequr Bordin do të ishte i mirëpritur.
“Duke qenë që çmimi i karburanteve është stabilizuar, kemi një diskutim për ndalimin e të funksionuarit te Bordit. I përket Ministrisë së Financave dhe do jetë i mirëpritur si vendim. Shteti do të monitoroj edhe nëse bordi nuk do të jetë ekzistues” përfundoi Balluku.
Konfindustria shqiptare dënon mosndërhyrjen e Bordit të Karburanteve në rregullimin e çmimeve të naftës dhe produkteve të tjera, pavarësisht se prej ditësh në bursë çmimi ka rënë ndjeshëm, gati në të njëjtin nivel sa para luftës në Ukrainë.
Ndërkohë, prej mëse 2 javësh çmimi i naftës në tregun shqiptar është në kufijtë e pothuaj 200 lekë/litër. Bordi i Transparencës vijon të mos mblidhet prej mëse tre javësh. Mbledhja e fundit daton më 20 dhjetor, pavarësisht se në bursë çmimi i naftës është ulur me 2.9%.
“Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 199 lekë/litër, ndërsa i shitjes me shumicë jo më shumë se 187 lekë/litër. Çmimi i shitjes me pakicë i nënproduktit benzinë e standardit SSH EN të jetë jo më shumë se 177 lekë/litër, ndërsa i shitjes me shumicë jo më shumë se 165 lekë/litër. Çmimi i shitjes me pakicë i nënproduktit gaz, të jetë 71 lekë/litër me pakicë dhe i shitjes me shumicë 59 lekë/litër për automjetet”, thuhej në njoftimin e Bordit asokohe.
Sakaq, Bordi në vijueshmëri është akuzuar se favorizon hapur oligarkët e tregut të karburanteve sepse në një kohë që nafta ka rënë në bursë po vonon qëllimisht uljen e çmimit. Ndërkohë, kur çmimet rriten në tregun ndërkombëtar, Bordi del menjëherë me vendim.
