Rezarta Dobi dhe i biri i saj Havier Dobi gjenden pas hekurave, ndërkohë sot në banesën e tyre u gjetën edhe 404 mijë euro të tjera të fshehura në tubin e aspirimit të kuzhinës, shumë e cila është vjedhur së bashku me 120 mijë eurot e zbuluara më parë, në banesën e zyrtares së Kryeministrisë, Alda Klosi.
Referuar situatës së krijuar në familjen Dobi pasi të gjitha detajet mbi grabitjen dolën në dritë, bashkëshorti i pastrueses Spartak Dobi thotë se e ka kaluar gjithë ditën me ministrin e Drejtësisë Ulsi Manja, të cilit i ka kërkuar t’i lirojë të birin.
Ai tha për emisionin “Revieë” se Manja i ka premtuar që djalin e tij Havier Dobi do të bëjnë çmos që ta lirojnë nga burgu, teksa pretendon se i biri 23-vjeçar është i pafajshëm.
Sipas Spartak Dobit gjithçka që i biri ka bërë ia ka mësuar e ëma, për të cilën thotë se duhet të dënohet.
“Sot kam qëndruar gjithë ditën me ministrin e drejtësisë. I kam treguar për ngjarjen e më tha do të bëjmë çmos që djalin ta lirojmë por gruan jo. I thashë gruan çojeni më tej Stambollit. Djali nuk ka faj, e ka mësuar e ëma. I kishim në rregull të gjithë gjërat. Djali shkonte punonte natën”, tha ai.
