Olta Xhaçka i konsideroi sërish shpifje akuzat e opozitës se bashkëshorti i saj, Artan Gaçi ka fituar statusin e investitorit strategjik në kushtet e konfliktit të interesit.
Ministrja e Jashtme deklaroi në një konferencë për median mesditën e së shtunës se nuk ka shkelur asnjë ligj dhe nuk kaluar asnjë normë etike dhe morale.
Por, përtej deklaratave publike, Xhaçka dhe bashkëshorti i saj e dinë që kanë probleme me ligjin e konfliktit të interesit dhe po tentojnë të gjejnë zgjidhje.
Syri Televizion ka siguruar një dokument që mban datën 24 qershor 2022, pra disa muaj pasi shpërtheu skandali. Sipas këtij dokumenti, Artan Gaçi, në cilësinë e ortakut të vetëm të kompanisë “AG.TCC”, e cila ka fituar statusin e investitorit strategjik, ka vendosur të emërojë një person të besuar në krye të biznesit.
Në këtë dokument, Gaçi merr vendimin për të kaluar zotërues pasiv i aksioneve të tij, bazuar në kërkesat e ligjit “Për parandalimin e konfliktit të interesave”.
Ligji parashikon ndër të tjera që familjarët e zyrtarëve të lartë dhe kompanitë ku ata kanë aksione aktive, nuk mund të përfitojnë kontrata ose përfitime nga autoritetet shtetërore. Pra, duket qartë që Artan Gaçi ka mendur t’u shpëtojë telasheve ligjore duke kaluar të drejtën e përdorimit të aksioneve të tij tek një person i besuar.
Por lëvizja është e vonuar dhe nuk duket se do ta ndihmojë shumë.Kompania “AG.TCC” ka përfituar statusin e investitorit strategjik për ndërtimin e një resorti turistik në Himarë nga Komiteti përkatës i drejtuar nga Edi Rama në mars të vitit 2021, në një kohë që Artan Gaçi ka qenë ortak me kohë të plotë në kompani.
Po ashtu, qeveria shqiptare miratoi në mars të vitit 2022 lejen për shfrytëzimin e bregut të detit përballë resortit nga kompania “AG.TCC Hotel Management”.
Kjo kompani menaxhuese është në pronësi të amerikanes Taëni Lin Grzych-Sutton, për të cilën media zbuloi se është bashkëjetuese e vëllait të Artan Gaçit, njëkohësisht kunat i Olta Xhaçkës.Çështja “Xhaçka-Gaçi” pritet të shqyrtohet së shpejti nga Gjykata Kushtetuese, pas një padie të dorëzuar nga opozita parlamentare./SyriTv
