Britania e Madhe po has në vështirësi të mëdha me përballimin e fluksit të emigranntëve të paligjshëm dhe së fundmi autoritetet kanë deklaruar se iu mungon kapaciteti për planin e Rishi Sunak për të burgosur ose dërguar në qendrat e pritjes çdo emigrant që kalon Kanalin me gomone.
Kryeinspektori i burgjeve Charlie Taylor tha se qeveria do të duhet të rrisë në mënyrë dramatike stokun e saj të akomodimit të sigurt që plani të funksionojë duke qenë se shumica e qendrave janë tashmë të mbipopulluara.
Kryeministri ka premtuar një legjislacion të ri, që pritet muajin e ardhshëm, i cili do të lejojë këdo që kalon Kanalin të mbahet në pritje të vendimit për largimin e tij drejt vendit të origjinës ose deportimit në një vend të tretë si Ruanda.
Por, Taylor paralajmëroi se mungesa e hapësirës në qendrat e largimit të imigracionit nënkuptonte se iniciativa mund të ishte e dënuar të dështonte që në start.
Dhe ai hodhi poshtë idenë se emigrantët mund të mbaheshin në burgje në vend të kësaj – duke qenë se disa të burgosur tashmë po mbahen në qeli brenda stacioneve të policisë për shkak të presioneve në burgje.
“Sigurisht që nuk ka vende, kështu që ne do të duhet të presim dhe të shohim se cilat janë planet e Home Office me këtë strategji të re“, tha ai për The Times.
I pyetur mbi mundësinë e vendosjes së emigrantëve që kalojnë Kanalin në qelitë e burgjeve, ai tha: “Ideja se do të gjendet kapaciteti brenda burgut për të burgosurit e emigracionit është jashtëzakonisht i pamundur“.
Qeveria aktualisht po ndërton dy objekte të reja paraburgimi, një në një ish-bazë ushtarake në Hampshire dhe tjetra në Campsfield House.
Sakaq, ministrat janë të vendosur të gjejnë mënyra të reja për të penguar emigrantët të kalojnë Kanalin, me 45,756 emigrantë që e bënë këtë udhëtim të rrezikshëm vitin e kaluar.
