Nënkryetari i Bashkisë së Pogracedit, Johan Sterjo ka dhënë dorëheqjen rreth një javë pas arrestimit të motrës së tij, Viola Sterjo. Lajmin e bën me dije dega e Partisë Demokratike në Pogradec, duke e quajtur dorëheqjen e tij si “me urdhër nga lart”.
“Dorëheqja” (me urdhër nga lart) nga posti i Nënkryetarit të Bashkisë Johan Sterjo, edhe pse veç administratës askush në këtë qytet nuk e njeh, është një lajm i mirë për qytetin. Tani i mbetet të lirojë nga uzurpimi edhe Ujësjellësin e Pogradecit. Gjithsesi, Sterjo është vetëm një nga problemet e qeverisjes lokale. Problemi më i madh do të largohet me ceremoni në 14 Maj”, thuhet në reagimin e PD Pogradec.
Viola Sterjo u arrestua pasi përmes mashtrimit kishte fituar shuma të mëdha parash nga biznesmenë të ndryshëm në Korçë, kundrejt premtimit se do të ndërhynte te AZHBR-ja për të përfituar grante në favor të tyre.
Nga të paktën katër biznesmenë ajo ka marrë shuma si 57 mijë euro, 28 mijë euro e deri te 190 mijë euro nga një biznesmen tjetër të cilit i kishte premtuar përfitimin e një granti prej 1.2 milionë euro.
