Zëdhënësi i Kishës Katolike në Shqipëri, Dom Mark Pashkja tha në një intervistë për Euronews Albania se dorëheqja e ish-Papa Benedikti XVI nënkuptonte një mesazh edhe për politikanët.
Sipas tij, teologu gjerman do të mbahet mend si Papa i parë që dha dorëheqjen në 600 vite, formë kjo për t’i treguar politikës se edhe në atë fushë duhet të ketë momente për dorëheqje.
“Vendimi për të dhënë dorëheqjen nga selia e pasardhësit të Pjetrit ka qenë një vendim i cili është konsultuar vazhdimisht në lutje dhe në një marrëdhënie intime, personale me Zotin. Kjo është për të treguar atë që në fakt qëndron në thelb të çdo identiteti të krishterë e aq më tepër Papës, pra kur një vendim merret nuk është thjesht një vendim që bazohet në nivel racional, por kryesisht në nivel relacional,” – u shpreh Dom Mark Pashkja.
Sot u përcoll për në banesën e fundit ish-Papa Benedikti XVI i cili u nda nga jeta më 31 dhjetor. Roma ishte e blinduar nga forcat e shumta te sigurisë pasi mijëra qytetarë morrën pjesë në ceremoninë e lamtumirës e udhëhequr nga Papa Françesku.
