Në “Anfield” u luajt ndeshja e javës së 18-të të Premier League, e cila nisi me gol thuajse nga “tuneli”, por pati përmbysjen epike me dy autogola. Rezultati 2-1 i ka buzëqeshur skuadrës së Klopp në fund të fundit. Kanë qenë miqtë e Leicester City, ata që kanë zhbllokuar shifrat e bardha shumë shpejt, që në minutën e 4-t, me autor K.Dewsbury-Hall.
Një befasi e pëkandshme për “Reds”, që duket qartë se duhet të djersijnë shumë këtë mbrëmje. Liverpool ka iniciativën, ndërmerr aksione të shumta, del me shpejtësi edhe në kundërsulm, por miqtë janë të vendosur mirë në prapavijë.
Leicester e pret kundërshtarin dhe pastaj duke shfrytëzuar hapësirat e krijuara në prapavijë nga “Reds”, të hedhur në kërkim të barazimit, mundohen të “kafshojnë” sërish. Luhet një ndeshje mjaft e zjarrtë, me ritëm dhe emocione.
Presioni në rritje i të kuqve bëri që mbrojtja mike të gabojë. Për fat të keq, i njëjti lojtar shkaktoi dy autogola në pjesën e parë, duke i dërguar skuadrat në dhomat e zhveshjes me fitoren 2-1 të Liverpool.
Në minutën e 38-të dhe 45, Wout Faes e dërgoi topin në rrjetën e tij, duke kompletuar një mbrëmje për t’u harruar në planin personal.
Sa për kujtesë: Wout Faes është lojtari i katërt me dy autogola në një ndeshje të vetme të Premier League, pas Jamie Carragher (1999, Liverpool-Man Utd), Michael Proctor (2003, Sunderland-Charlton) dhe Jonathan Walters (2013, Stoke-Chelsea).
Pjesa e dytë është më e qetë, me vendësit që administrojnë avantazhin. Leicester nga ana tjetër përpiqet të shtyjë përpara, për të rrezikuar portën e Alison, por prapavija e kuqe është në lartësinë e detyrës. Me këtë sukses, Liverpool ngjitet në kuotën e 28 pikëve, duke u renditur në vendin e gjashtë për momentin në Premier League.
Kreu është jo pak larg, Skuadra e Klopp është 12 pikë distancë nga Arsenali kryesues. Beteja vazhdon, por duket se titulli do të jetë mision tepër i vështirë për “Reds” këtë sezon.
