Banka Botërore publikoi pak ditë më parë Dokumentin e Informacionit të Projektit që përfshin Shqipërinë dhe konkretisht sektorin bujqësor në një financim 70 milionë dollar.
Projekti “Qëndrueshmëria ndaj Klimës dhe Zhvillimit të Bujqësisë” fut për herë të parë konceptin më të zgjeruar të bujqësisë “inteligjente” por në anën tjetër mbështet edhe investime konkrete në disa rajone. Projekti pritet që të marrë miratim nga Bordi i Bankës në 16 mars të vitit të ardhshëm.
Lidhur me të njëjtin projekt edhe Ministria e Bujqësisë dhe Zhvillimit Rural është në fazë konsultimi mbi projektin duke kërkuar mendimin e palëve të interesuara për fazën e hartimit të Kornizës së Planit Mjedisor dhe Social. Por cilët janë komponentët që mbështet në fakt projekti që do të financohet me një kredi nga Banka Botërore.
Projekti do të ketë komponentët e mëposhtëm:
“Komponenti 1: Promovimi i Bujqësisë Inteligjente për Klimën dhe Aksesin në Tregje:
a) Nën-komponenti 1.1 Promovimi i Zinxhirëve të Vlerave dhe Elastike ndaj Klimës
i) Zhvillimi i zinxhirëve të shkurtër të vlerës; ii) Promovimi i produkteve tipike dhe shtimi i vlerës; iii) Zhvillimi i një Platforme IT për Bujqësinë Smart Klimatike (CSA).
b) Nën-komponenti 1.2 Modernizimi i Skemave të Përzgjedhura të Ujitjes dhe Kullimit
i) Modernizimi i skemave me presion për Skemën Ujitëse Divjakë; ii) Modernizimi i skemave me presion për Skemën Ujitëse Mursi; iii) Rivitalizimi i Skemës së Ujitjes së Lushnjës; iv) Modernizimi i sistemeve të kullimit.
Komponenti 2: Rritja e Përputhshmërisë me Standardet e Sigurisë dhe Cilësisë së Ushqimit:
a) Krijimi dhe përmirësimi i pikave të Inspektimit Kufitar (PIK);
b) Përmirësimi i kapaciteteve inspektuese dhe mbështetjes diagnostikim në fushën e sigurisë ushqimore, analizave veterinare dhe shëndetit të bimëve;
c) Zhvillimi i kapacitetit të ruajtjes për mallrat e ndaluara që nuk përputhen me standardet e sigurisë ushqimore, veterinare ose të shëndetit të bimëve.
Komponenti 3: Forcimi i Kapacitetit të Analizës së Bazuar në Mbështetje të MBZHR-së dhe Bashkive për rritjen e kapacitetit menaxhues”, thuhet në përmbledhjen e ministrisë mbi projektin./Monitor
