Nga Boldnews.al
Kryetari i Komisionit Qendror të Zgjedhjeve, Ilirjan Celibashi, ka hapur “qesen” para zgjedhjeve lokale të majit 2023. Me një të rënë të lapsi, Celibashi do të shpenzojë plot 150 mijë euro vetëm për materiale promocioni. Pra, një shumë e majmë vetëm për çadra dhe letra për filxhanët e kafesë me logon e KQZ-së. Po kujt do t’i duhen këto materiale?! Dhe përse një shumë e majmë vetëm për promocionin, kur në fakt procesi i votimit dhe numërimit ka një mori problematikash. Dhe me këto para’, a zgjidhen të gjitha problematikat e KQZ-së?!
Natyrisht që jo, po Celibashi është një specialist i vjetër, ndërsa i vë shumë rëndësi propagandës, të cilën e përdorin ata që e kanë zgjedhur në krye të këtij institucioni.
BoldNews.al shfletoi dokumentet e këtij tenderi, ku bie në sy edhe materialet që do të blejë Komisioni Qendror i Zgjedhjeve. Mësohet se objekti i kontratës është “materiale ndihmëse në fushatën edukuese, sensibilizuese, informuese dhe administratën zgjedhore”. Fondi limit i këtij tenderi është 14.781.867 lekë pa TVSH, ose me TVSH rreth 150 mijë euro. KQZ-ja ka vendosur se firma duhet të ketë kapacitete të stafit të tij për të prodhuar gjithë sasinë e kërkuar të shtypshkrimeve me një staf minimal prej 30 personash të paktën 3 muajt e fundit.
“Theksojmë se mbi 70 % e mallit që kërkohet është për periudha zgjedhore. AK nga momenti i vendimmarrjes mbi modelet se si do të jenë këto mallra deri në shpërndarjen e tyre ka shumë pak kohë në dispozicion. Fushata edukuese dhe informuese bazuar në programin e miratuar nga KQZ do të fillojë në janar 2023 deri në datën e zgjedhjeve 14 maj 2023” thuhet në këto dokumente. Më tej pohohet se për 5 muajt në vijim janë muaj të periudhës zgjedhore ku materialet do të duhen në kohe të përcaktuar dhe numri i kërkuar i punonjësve është garanci që OE mund të realizoj kërkesat duke punuar dhe me 3 turne nëse do të duhet.
Në dokumentet shoqëruese, KQZ kërkon “letra promocioni që vendosen në filxhanët e kafesë, të cilat do të kenë mesazh dhe logo KQZ të printuar”. Më tej, kërkohen çadra me logon e KQZ, do të ketë mesazh dhe logo të printuar. Gjithashtu jelekë për anëtarët e KZAZ-ve, për anëtarët e GNV-ve, për operatoret PEI, për operatoret PEVN dhe jelekë për stafin e përkohshëm në Lundër.
Më tej Celibashi kërkon “cover/mbajtëse telefoni me logon e KQZ”. Gjithashtu edhe bluza t-shirt, pambuk i bardhë 100 % i stampuar me logo KQZ, logo dhe slogan të zgjedhjeve me 5 ngjyra. Kërkon edhe blloqe agjende me logo te KQZ-së, çanta pëlhure. Më tej kërkohet baner roll – up me logo kqz me mekanizëm, veshja me material adeziv me logo të zgjedhjeve të tryezave të promocionit.
