Sonila Kruja, menaxherja e restorantit ku janë helmuar 3 personat mbrëmjen e djeshme në Shkodër ka reaguar duke treguar si ka ndodhur ngjarja.
Ajo thotë se shishja ka qenë e ambalazhuar dhe ngjarja nuk ka lidhje me lokalin, ndërsa kërkon zbardhjen e ngjarjes nga policia.
“Shishja e ujit ka qenë e ambalazhuar, ky ujë serviret në lokalin tonë prej vitesh dhe nuk kemi pasur asnjë lloj incidenti. Kemi njoftuar organet kompetente, kemi dorëzuar kamerat e sigurisë dhe jemi të hapur ndaj të gjitha organeve ligzbatuese për çfarëdolloj kërkese. Nuk ka pasur asnjë lloj neglizhimi nga ana e stafit. Inkurajojmë organet kompetente për zbardhjen sa më shpejt të ngjarjes në mënyrë që t’i kthehemi normalitetit dhe të mirëpresim klientët tanë. Mbrëmë lokali ka qenë plot dhe të gjithë kanë konsumuar të njëjtin ujë, por askush tjetër nuk ka shfaqur asnjë shenjë helmimi”, tha menaxherja e lokalit.
“Menjëherë sapo nënë e bir kanë shfaqur shenja helmimi ja kanë raportuar stafit tonë. Stafi jonë ka marrë masa për ti dhënë ndihmën e parë ndërkohë kamarieri që e ka hapur shishen nuk e ka besuar se ata janë helmuar me ujin në shishe dhe e ka pirë dhe ai. Edhe ai ka shfaqur të njëjtat shenja helmimi. Ne kemi njoftuar organet kompetente për ngjarjen dhe kemi dorëzuar kamerat e sigurisë. Jemi të hapur për çdo organ ligjzbatues për çdo kërkesë që mund të kenë”, shtoi ajo.
