Ashtu siç edhe ishte paralajmëruar gjatë muajve të fundit, qeveria pritet t’i hapë rrugën rikthimit të basteve sportive në vend dhe përfundimin pa sukses të operacionit “Fundi i Marrëzisë” që u trumbetua si sukses në 2018.
Sinjalin e parë të rëndësishëm për rikthimin e pikave të basteve e dha vetë kryeministri Edi Rama në një dëgjesë publike me federatat e sportit në muajin gusht.
Rama asokohe pranoi dështimin e qeverisë së tij për ta bllokuar këtë industri, që sipas tij nëse rikthehej do të gjallëronte ekonominë, pasi bastet online qarkullonin deri në 5 milionë euro në vit.
Ai foli gjithashtu për licensim të kompanive ndërkombëtare në Shqipëri, duke argumentuar se rikthimi i lojërave të fatit dhe mbajtja nën kontroll e tregut sipas rregullave të caktuara, do të godasë në mënyrë efektive aktivitetin e zhvilluar në të zezë nga elementë kriminalë gjatë këtyre viteve.
“Fakti që ky aktivitet nuk ka ardhur në rënie, që pavarësisht arrestimeve, dënimeve, në një pjesë të caktuar edhe gjykatat kanë dhënë kontributin e tyre negativ… sidoqoftë nuk ka rënë si aktivitet; nuk ka rënë si numër pjesëmarrësish, e bën të domosdoshëm këtë reflektim që bëjmë sot. Me gjithë konsultat me ekspertë të botës dixhitale rezulton e pamundur të bllokohet sistemi. Kjo më bën të hapur ndaj kësaj zgjidhjeje se është gjynah që kjo veprimtari të zhvillohet nga duar të njerëzve që shkelin ligjin dhe kanë rezultuar me përfitime krejt të paarsyeshme elementë me profil të lartë në krimin e organizuar”, tha Rama 5 muaj më parë.
Ndërkohë, sot në një konferencë për mediat, ministrja e Financave Delina Ibrahmiaj e pyetur nga gazetarët se kur do të lejohen bastet sportive tha se procesi është duke u finalizuar dhe me fillimin e vitit të ri do të nisin procedurat për miratimin e ligjit.
“Ne kemi punuar intensivisht gjatë muajve të fundit me qëllim finalizimin e ndryshimeve ligjore në ligjin për lojërat e fatit. Me qëllim lejimin e basteve sportive online duke pasur shumë kujdes të ruajmë ato kritere e parametra që kanë qenë të përcaktuara. Jemi në proces te finalizimit. Me nisjen e vitit të ri 2023, do nisim procedurat e miratimit të këtij ligji. Ne gjykimin tim, brenda 3 mujorit të parë të vitit 2023 ky ligj pritet të miratohet në parlament”, tha Ibrahimaj.
