Kreu i Federatës Shqiptare të Futbollit, Armand Duka, ka folur në lidhje me trajnerin e ri të Kombëtares, por edhe vendimin për mosrinovimin me Edi Rejën. Në një intervistë në “Studio Sport” Duka pranoi se zgjedhja e Panuçit në krye të Kombëtares kuqezi ka qenë një gabim ndërsa foli edhe për trajnerin e ri të Kombëtares.
GABIMI ME PANUÇIN-“Më duhet ta pranoj që kam gabuar me Panuçin, sikurse nuk kam gabuar në asnjë rast tjetër. Por edhe trajnerët pa eksperiencë kanë pasur përvoja shumë të mira në futbollin europian dhe botëror, siç është rasti i Guardiolës apo Zidanit, futbollistë të mëdhenj që u bënë trajnerë të mëdhenj”.
TRAJNERI I RI-“Janarin do ta fillojmë me stafin e ri për t’u përgatitur për ‘Euro 2024’. Kemi folur edhe me trajnerët shqiptarë. Dikush e ka pranuar ofertën tonë për bisedime e dikush jo”,
NDARJA ME REJËN- “Pavarësisht rezultateve më të mira që mund të kishte marrë Reja në Nations League, unë mendoj se në fund të eliminatoreve ekipi kombëtar shqiptar duhej të ndahej nga stafi i Edi Rejës. Për disa arsye, mbase edhe për arsye të moshës së tij, diferencës së madhe me futbollistët në moshë. Gjithnjë një ekip që ka përpara një objektiv madhor si “Euro 2024”, duhet të ketë energji ndryshe”,përfundoi Duka.
