Autoriteti Kombëtar i Ushqimit bën me dije se ka nisur procedurat për tërheqjen nga tregu të një suplement që shitet për rënien e flokëve, pasi nga kontrollet laboratorike rezultoi se përmbante pluhur qelqi.
Autoriteti Kombëtar i Ushqimit njofton se produkti në fjalë është “DU ANACAPS EXPERT 30 CAPS”, i cili është suplement që konsumohet me qëllim mos rënien e flokëve si dhe në ruajtjen e thonjve të shëndetshëm.
“Referuar informacionit të ardhur nga sistemi RASSF (Sistemi i Alertimit të Shpejtë për Ushqimin dhe Ushqimin për Kafshë), pas analizave laboratorike të kryera nga Gjermania është konstatuar prani e trupave të huaj, pluhur qelqi, në produktin DU ANACAPS EXPERT 30 CAPS, suplemente ushqimore me Nr.Loti 2K1MC”, njofton AKU.
Autoriteti Kombëtar i Ushqimit shton se po ndërmerr të gjitha masat e nevojshme nëpërmjet kontrolleve zyrtare në operatorët e biznesit që tregtojnë këto suplemente ushqimore, për identifikimin, blllokimin dhe tërheqjen e produktit.
“Autoriteti Kombëtar i Ushqimit i bën thirrje konsumatorëve që e kanë blerë këtë produkt të mos e konsumojnë por ta kthejnë pranë subjektit ku e kanë blerë”, thuhet më tej në njoftimin e AKU-së.
