Ministria e Jashtme e Iranit njoftoi sot se arrestimet e qytetarëve të lidhur me Mbretërinë e Bashkuar treguan rolin e dëmshëm të Londrës në protestat e fundit në vend.
I pyetur nga një gazetar për të komentuar njoftimin e djeshëm të Teheranit për arrestimin e shtatë personave të lidhur me Britaninë, zëdhënësi i Ministrisë së Jashtme iraniane Nasser Kanani u përgjigj: “Disa vende, veçanërisht ai që përmendni, kanë pasur një rol jokonstruktiv në lidhje me zhvillimet e fundit në Iran. Roli i tyre ishte në përgjithësi katastrofik në nxitjen e protestave.”
Garda Revolucionare e Iranit njoftoi dje se shtatë persona ishin arrestuar , duke përfshirë disa me shtetësi të dyfishtë. Arrestimet u kryen në lidhje me protestat antiqeveritare që tronditën vendin.
Ministria e Jashtme Britanike ka njoftuar se po kërkon më shumë informacion nga autoritetet iraniane në lidhje me raportimet se janë arrestuar edhe shtetas britaniko-iranianë me shtetësi të dyfishtë.
