Ka hyrë në ditën e tretë greva e urisë së personave me aftësi të kufizuara në qytetin e Elbasanit.
Ata kërkojnë nga qeveria rikthimin e pagesave që u takon për kategorinë e tyre sociale, për të cilën thonë se u është hequr. Nëna e një invalidi 41-vjeçari kërkoi nga kryeministri Rama rikthimin e ndihmës sociale. Madje ajo tha se nëse fëmija i saj do të mund të lëvizte, ajo nuk do të kërkonte kurrë ndihmë ekonomike nga ana e shtetit.
“Unë vdes për fëmijën dhe zoti ia ka dhënë jetën dhe zoti mund t’ia marrë, nuk mund t’ia marrë kempi epror. Të vijnë të takohen me ne dhe t’i jepet e drejta fëmijës. Të vijë zoti kryeministër dhe të takohet me mua pse ia ka hequr. Mua më tha që kempin epror ia ka heq kryeministri. Kur ia ka heq kryeministri të vijë të më takojë mua si nënë. Ta shoh fëmijën të ma çojë në banjë dhe të ma sjelli mua prapë. Unë nuk dua asnjë lekë po pashë fëmijën të eci. Fëmija ka 41 vjet që nuk ka hedhur një hap”, tha nëna për Euronews Albania.
Grevistët invalidë u shprehën se edhe pse janë në ditën e tretë nuk ka shkuar askush nga institucionet shtetërore që t`i vizitojë.
Ata thonë që nuk kanë pasur ndihmë mjekësore, ndërsa të vetmit që u rrinë afër janë familjarët. Invalidët ndihen të dëshpëruar për braktisjen që po u bëhet, ndërsa dëshpërimin e tyre e shton më tej fakti se në këto ditë festash, ata nuk kanë mundësi të jenë pranë familjeve dhe të gëzojnë si gjithë të tjerët.
Nëna e një djali invalid, bëri një denoncim duke deklaruar se KEMPI epror i ka prerë pagesën të birit duke i thënë se ai mund të ngrihet në këmbë, ndërkohë që është e kundërta.
