Eljon Sota ndoshta nuk kishte besimin e du hur nga drejtuesit, por me durimin e cilësitë e tij e ka “betonuar” vendin në formacion dhe është rikthyer në një nga lojtarët më të rëndësishëm në rreshtimin e Partizanit.
Në një intervistë për “Panorama Sport”, qendërmbrojtësi nga Fieri tregon se si skuadra e përgatiti derbin dhe bindjen që lojtarët kishin se do ta fitonin. 24- vjeçari shprehet se triumfi ndaj Tiranës ia rrit skuadrës besimin për të shkuar te titulli.
Sa e vështirë ishte ta fitonit këtë ndeshje ndaj Tiranës?
Ishte shumë e vështirë, si çdo ndeshje tjetër, sidomos derbi, që është një ndeshje shumë e luftuar. Në të tilla përballje, përveç faktit që duhet të jesh shumë i fortë fizikisht, taktikisht dhe teknikisht, duhet të jesh në nivelin e duhur edhe psikologjikisht. Kështu që padyshim ishte një ndeshje shumë e vështirë.
Si e përgatiti Partizani këtë derbi?
E kemi përgatitur si çdo ndeshje tjetër, por këtë herë çunat kanë qenë më të bindur se asnjëherë tjetër. Ishim të gjithë në një mendje dhe na ishte kthyer në bindje që do ta fitonim dhe nuk kisha parë një ndeshje tjetër që të ishim aq të sigurt të gjithë se do ta fitonim këtë ndeshje. Kjo mendoj se ishte arsyeja kryesore përse fituam.
Këtë vit u ndërtua stadiumi, kërkohet edhe titulli. I arrin dot Partizani të dyja brenda këtij sezoni?
Është shumë e arritshme. Përderisa jemi të parët, mundësitë janë. Edhe si ekip, i kemi mundësitë për të bërë akoma më shumë. Do të ishte një dhuratë e bukur edhe për stadiumin, që të kishte edhe një titull në të njëjtin vit që është ndërtuar.
Ju bën të ndiheni më të fortë fitorja e këtij derbi?
Na jep shumë besim. Ne mendojmë se jemi të fortë, por pas kësaj fitoreje na shtohet akoma më shumë besimi të forca jonë. Por rruga për të shkuar të titulli është shumë e gjatë akoma. Janë edhe shumë ndeshje, është shumë herët.
Çfarë note i vini vetes dhe skuadrës në këtë pjesë të parë të sezonit?
Nuk më ka pëlqyer asnjëherë t’i vendos nota vetes. Gjithnjë shoh që kam shumë gjëra për të përmirësuar. Të njëjtën gjë mendoj edhe për ekipin. Kur je në vend të parë meriton notën 10, por në fund po ta mendosh ka ende edhe shumë gjëra për të bërë dhe përmirësuar./Panoramasport
