Nga Boldnews.al
Pak muaj para zgjedhjeve lokale, kryetari i Bashkisë së Tiranës, Erion Veliaj, ka shpallur tendera në vlerë disa dhjetra milionë euro për “asfaltim elektoral” të disa rrugëve e rrugicave të qytetit.
Si në çdo rast, edhe kësaj here, procedurat tenderuese të Veliajt nuk i shmangin dyshimet për abuzivizëm dhe fryrje të faturave financiare.
“Boldnews.al” ka analizuar një prej tenderave të shpallur nga Bashkia e Tiranës në mes të Dhjetorit 2022.
Procedura ka për objekt “Rikualifikim urban i bllokut kufizuar nga rrugët 3 Dëshmorët – Rexhep Shala – Joaklin Persi”, me fond limit rreth 196 milionë lekë të reja pa TVSH ose rreth 1.6 milionë euro.
Blloku i banesave gjendet në zonën e Yzberishtit dhe përfshin rrugicat e disa grupe pallatesh, të ndërtuara kryesisht pas vitit 2010.
Sipas dokumentave të tenderit të shpallur nga Veliaj, “gjendja e rrugëve në këtë bllok paraqitet pothuajse pa asnjë parametër inxhinierik…Pothuajse të gjitha rrugët e brendëshme të bllokut janë të shtruara me shtresë betoni të varfër, ndërsa pjesa tjetër janë totalisht pa asnjë shtresë rrugore duke mbizotëruar gropat e shumta në të cilat në periudhë shirash bëhen pothuajse të pakalueshme…”.
Për të argumentuar këtë konstatim, në dokumentat e tenderit janë paraqitur edhe disa foto të situatës në disa rrugica që gjenden brenda bllokut të banimit, të cilat tregojnë për një situatë tejet të vështirë, pa asfalt edhe me gropa.
Por, sipas një vëzhgimi të kryer këtë fundjavë nga “Boldnews.al”, rezulton se disa prej atyre rrugëve e rrugicave me gropa, tashmë janë të sistemuara.
Nga krahasimi nëpërmjet asaj që Veliaj e stafit i tij prezantojnë në dokumenta dhe gjendjes reale të rrugës, ngrihen dyshime se Bashkia ka fryrë ndjeshëm faturën financiare të tenderit 1.6 milionë euro.
Krahasimi, Veliaj del zbuluar
- Në dokumentat e tenderit janë disa foto të emërtuara “Sheshi 4”, që i përket edhe hyrjes së bllokut rezidencial të përfshirë në projektin e “rikualifikimit urban”.
Në fotot e dokumentave, sheshi dallohet që është në gjendje aspak të mirë, me një shtresë asfalti të varfër, e cila krijon gropa e pellgje me ujë.
Ndërkohë, në fotot e realizuara nga “Boldnews.al” këtë fundjavë, rezulton se gjendja e këtij sheshi është shumë më e përmirësuar. Rruga ka një shtresë asfaltike, të rregulluar nga Bashkia e Tiranës pak muaj më parë.
Natyrisht, sheshi mund të ketë nevojë për vendosjen e një rregulli, kryesisht me vijëzime, por nuk duket aspak se ka nevojë për asfaktin, siç pretendohet në tenderin e Veliajt.
- Në dokumentat e tenderit, janë disa foto të emërtuara “Sheshi 5”. Sipas këtyre pamjeve, këto rrugë janë të degraduara dhe është e pamundur lëvizja e mjeteve. Dhe, në këto kushte, Bashkia e Veliajt ka vendosur të shpenzojë miliona euro, me qëllimin e deklaruar për lehtësimin e jetesës së banorëve.
Vëzhgimi në terren tregon një situatë shumë më të ndryshme. “Boldnews.al” ka realizuar foto të shkrepura nga i njëjti kënd që janë pamjet e vendosura në dokumentat e tenderit.
Siç dallohet nga fotot, gjendja aktuale e këtyre rrugëve nuk është në atë gjendje të mjerueshme që paraqiten në tender. Pra, edhe në këtë rast, duket se situata është trajtuar “tragjikisht” për të justifikuar faturën e fryrë të tenderit.
- Në dokumentat e tenderit të Veliajt është prezantuar edhe emergjenca për asfaltim e një rruge, e cila, sipas fotove të realizuara nga Bashkia, ajo nuk mund të quhet aspak rrugë.
Fotoja tregon një pamje, ku rrugica është plot gropa, baltë dhe pa asnjë shenjë të dukshme asfalti.
“Boldnews.al”, gjatë verifikimeve në terren, ka konstatuar se situata e kësaj rruge nuk është aspak në gjendje të mjerueshme, siç e paraqet Bashkia e Tiranës.
Rruga ka asfalt të rregullt, ka shtylla ndriçimi. Por, natyrisht, ajo mund të bëhet më e mirë nëpërmjet vijëzimit, një proces që kushton shumë herë më pak se sa asfaltimi.
Gjithësesi, pjesa tjetër e bllokut të kufizuar nga rrugët 3 Dëshmorët – Rexhep Shala – Joaklin Persi në zonën e Yzberishtit në Tiranë, ka nevoja për shtresa asfaltike dhe sistemimin e rrëmujës urbane.
Por, fakti që Veliaj ka vendosur në tender si “emergjente për rikonstruksion” edhe rrugë të sistemuara, krijon dyshimet e forta për fryrje abuzive të faturës 1.6 milionë euro për rikualifikimin urban të kësaj zone.
