Policia ka rrethuar këtë të Premte një pallat pranë shkollës “Petro Nini Luarasi” në rrugën “Margarita Tutulani”. Kjo pasi një përmbarues privat ka ardhur për të prishur pallatin, me pretendimin se është në pronësi të dikujt tjetër. Të moshuar të sëmurë, fëmijë, burra dhe gra, në mes të dimrit dhe në prag të Krishtlindjes, po nxirren në rrugë të madhe.
Një banor i pallatit shprehet se trualli është blerë dhe ndërtuar nga qeveria italiane dhe ata nuk do ndërtonin nëse nuk do e kishin të blerë truallin. Pas kësaj shteti i kishte strehuar aty me qira. Nuk njihet asnjë pronar tjetër por sipas pretendimeve të banorëve, personi që pretendon se është pronar ka falsifikuar dokumentet.
Gjithashtu banori shprehet se në vitin 2012 policia i kishte nxjerrë jashtë por pas ca kohësh ishin lejuar të futeshin prapë në banesat e tyre deri mëngjesin e sotëm që policia po kërkon ti nxjerrë përsëri për të shembur pallatin.
“E ka blerë italiani tokën. Ata blinin truallin pastaj ndërtonin. Në 2012 ka ardhur policia për të na nxjerr dhe na nxori por fjetëm në bodrum ca familje kurse un kam dalë me qera në vend tjetër. Ata bënë një tërheqje dhe familjet erdhën u futën prap në shtëpitë e tyre. Faktikisht ata nuk kanë prona këtu, kjo ka qenë e shtetit dhe atere na ka futur shteti me qera. Pas tërmetit na sollën një sizmik dhe sizmiku na tha nuk ka asnjë problem përveç çatisë. Nuk ka asnjë problem nga tërmeti godina. Këta duan ta shembin tani që të bëjnë pallat por si godinë është e banueshme. Policia në vend të na ndihmojë po na nxjerr jashtë. Ne jemi në pikë të hallit, nuk po interesohet asnjë për këtë punë, sikur jemi nga ndonjë planet tjetër”, është shprehur banori për mediat.
Një tjetër banore është shprehur se nuk e di se çfarë do ndodhi me pronën ndërsa thotë se do bëjnë rezistencë.
“Bredhin dyerve poshtë e përpjetë për të fituar pronën tonë, nuk dimë se çfarë do të ndërtohet në pronën tonë. Refuzon sepse ai është burrë plak, nuk ka ku shkon. Nuk e dimë si do të zgjidhet, ku do të shkojë ai burrë plak, ai është i vetëm, nuk ka njeri në shtëpi. Vetëm unë prgjigjem për të. Nuk ka ai tashi mendje që të vijë të japë intervista, ai është i sëmurë, ka kaluar një kalvar vuajtjesh. Djali i iku në moshë të re, gruaja po ashtu, ai ka ngelur i vetëm”, është shprehur ajo.
Një tjetër banorë është shprehur se do ti vejë flakën shtëpisë dhe do digjet dhe vetë brenda, sepse nuk ka asnjë opsion ku të shkojë nëse pallati shembet.
“Ka një Zot lart, duhet të dinë që ka një zot. Ta dinë, ato prona i marrshin tek varri, të na mbrojë shteti, ku është shteti. Që në ’80 kemi këtu, ku është mbrojtja, le ta marrë moj nëse është pronar. Më jep more një garsoniere të fus kokën. E blej dot shtëpinë unë me 200 mijë lekë që maee pension. Fërkojnë barkun njerëzit kur na shohin, ka ardhur njëri këtu që pretendon se është pronar. Më than a 5 milionë dhe dil jashtë, a është shteti prezent këtu? Çfarë mendojnë këta, se janë dy jevgj këtu dhe tre budallaçka këtu dhe na nxjerrin jashtë. Ne kemi fuqi, kemi si nuk kemi. Unë do tu vë zjarrin gjërave e do digjem dhe vetë brenda. Ku të shkoj, më jepni zgjidhje, ku të shkoj. Më jep një dhomë një kuzhinë, një aneks dhe të shkoj e të fle dhe unë”, është shprehur banorja.
