Helidon Bendo është liruar nga detyra e drejtorit të Shërbimit Informativ Kombëtar.
Presidenti Bajram Begaj ka liruar Bendon nga detyra pas propozimit të kryeministrit Edi Rama.
“Në mbështetje të nenit 93 të Kushtetutës, si dhe të nenit 5, paragrafit 2, të ligjit nr. 8391, datë 28.10.1998, ‘Për Shërbimin Informativ Kombëtar”’ të ndryshuar, me propozim të Kryeministrit, dekretoj: Zoti Helidon Bendo, lirohet nga detyra e drejtorit të Shërbimit Informativ Kombëtar”, thuhet në dekretin numër nr. 13887, që mban datën e sotme.
Në një postim në rrjetet sociale, kryeministri Rama tha se Bendo do të angazhohet në vijim si këshilltar i kryeministrit për reformën e institucioneve të sigurisë.
Sipas Ramës, Bendo dorëzoi dorëheqjen për arsye të studimeve pasuniversitare në SHBA.
“Me HELIDON BENDON, Drejtorin e Shërbimit Informativ të Shtetit, i cili për arsye të vazhdimit të studimeve pasuniversitare në Kolegjin e Studimeve Ndërkombëtare e të Sigurisë, pranë Universitetit Kombëtar të Mbrojtjes në Shtetet e Bashkuara, ka dorëzuar dorëheqjen. Ai do të angazhohet në vijim si këshilltar i kryeministrit për reformën e institucioneve të sigurisë“, shkroi Rama në FB.
Ka qenë kryetari i PD-së Sali Berisha ai i cili disa ditë më parë do të shprehej se Bendo, pas kthimit nga shkollimi në SHBA, nuk po lejohej të merrte detyrën, në kundërshtim me ligjin. Denoncimin e përsëriti dhe gjatë një konference për mediat më herët gjatë ditës së sotme. “Merr Helidon Bendon. I mbyll dyert në mënyrën më antiligjore, më antikushtetuese. Kreu i Shërbimit Informativ emërohet nga presidenti. Ky (Rama) e çoi vetë në shkollë, tani që është kthyer, e lë sikur nuk ka qenë ndonjëherë në shërbim. Ky është i sëmurë rëndë nga spiuno-fobia”, tha Berisha.
Helidon Bendo mori postin e kreut të SHISH më 5 nëntor të vitit 2018 për të qëndruar në këtë detyrë afro 4 vite. Asokohet Bendo zëvendësoi në krye të institucionit Visho Ajazin. Ky i fundit mbante postin e Drejtorit të Shërbimit Informativ nga Gushti i 2012.
Aktualisht, në vend të Bendos, në krye të SHISH është i komanduar zëvendësdrejtori Oljan Kanushi, që prej gusht 2022. Vendimi erdhi në një kohë kur Bendo ndodhej në SHBA prej 2 muajsh.
