Dy shqiptarë që u kontrabanduan në Mbretërinë e Bashkuar, e gjetën veten të mbyllur në një fabrikë kanabisi – duke u kujdesur për bimë me vlerë tregu gati gjysmë milioni paund. Klajdi Vraja dhe Ajet Xhaja, të dy 21 vjeç, u kapën më 7 tetor kur Policia bastisi magazinë në Lupton Road, Thame, rreth 100 metra larg Komisariatit të Policisë.
Shqiptarët u gjetën në një dhomë gjumi në katin e sipërm në fabrikë, e cila ishte pranë një ‘qendre lojërash’ për fëmijë. 800 bimët e kanabisit po rriteshin në një dhomë në katin e poshtëm dhe vlerësohej se kishin një vlerë, rreth 470,000 £.
Për Xhajën, Peter du Feu tha se klienti i tij ishte trafikuar nga shtëpia e tij në Shqipërinë rurale dhe ishte futur mes Belgjikës dhe Francës në pjesën e pasme të një kamioni.
“Askush nuk i tha atij se çfarë do e gjente në Angli. Nuk ishte zgjedhja e tij. Gangsterët nuk i marrin në Kanal, i marrin shpesh në Shqipëri. Ata kanë nevojë për punëtorë për fabrikat e tyre të kanabisit në këtë vend dhe i rekrutojnë në Shqipëri”, tha avokati.
“Askush nuk i tha se do të kishte një borxh prej mijëra paund për të cilin ai do të duhej të punonte; por kjo është ajo që ndodhi”, u shpreh avokati.
Eiran Reilly, për klientin e tij, Vraja tha se i riu kishte një borxh prej 20,000 paund që e kishte marrë për të paguar rrugën që të vinte në Angli në kërkim të një jete më të mirë.
Ai tha se dy të rinjtë nuk ishin larguar kurrë nga fabrika në Thame. Vraja dhe Xhaja, të dy pa adresë fikse, u deklaruan fajtorë në një seancë të mëparshme për prodhimin e një droge të klasit B.
Dy shqiptarët varën kokat teksa gjykatësi Michael Gledhill KC u komunikoi akuzën.
“Ju jeni dy të rinj shqiptarë që keni ardhur në këtë vend për atë që mendonit se do të ishte një jetë e mirë. Pa dyshim që ju jeni ndikuar nga shumë njerëz në atdhe, në Shqipëri dhe kishit shumë pak ide se çfarë do të ndodhte me ju nëse kontrabandistët do t’ju kalonin përmes Kanalit. Ju e vendosët veten në duart e kontrabandistëve. Ju të dy jeni burra inteligjentë. E dinit se çfarë po bënit, megjithëse ndoshta nuk i kishit kuptuar pasojat. Për të shlyer borxhin që u kishit këtyre gangsterëve, nuk kishit asnjë hezitim, ndoshta sepse nuk kishit shumë zgjedhje, të pranonit të punonit në këtë fabrikë kanabisi”, u tha ai.
Të dy djemtë janë shpallur fajtor, por nuk dihet se me nga sa vite burg do dënohen.
