Kreu i PD-së, Sali Berisha ka postuar në FB një video ku shfaqet Taulant Balla dhe kryebashkiaku i Fierit, Armando Subashi, duke kënduar.
“Aheng Balla-Subashi, për mbylljen e dosjes nga “Skapi” i partisë, për djegësin e Fierit!” shkruan Berisha me ironi.
Prokuroria Posaçme kundër Korrupsionit dhe Krimit të Organizuar Tiranë njoftoi ditën e djeshme mbylljen e hetimeve për dosjen e “inceneratorit të Fierit” dhe depozitimin në gjykatë kërkesën për gjykimin e çështjes.
Në total, janë 21 persona të akuzuar nga SPAK, kryesisht për korrupsion dhe shpërdorim detyre. Në listë nuk është emri i kryebashkiakut të Fierit, Armando Subashi.
Për çfarë e akuzon opozita Armando Subashin?
Opozita shprehet se Bashkia e Fierit vendosi të përcaktojë një pronë private për ndërtimin e inceneratorit të Fierit, ndërkohë që kishte në dispozicion toka shtetërore. Pra, megjithëse mund të kursente para për ngritjen e inceneratorit, Bashkia e Fierit vendosi të shpenzojë jo pak por rreth 460 milion lekë për dëmshpërblime.
Vendimi që u mor për të paguar qindra miliona lekë për vendin ku do të ndërtohej inceneratori i Fierit, hodhi dyshime për kryetarin e Bashkisë. Për të kursyer paratë e taksapaguesve, sipas opozitës, Subashi duhet të kishte zgjedhur një nga pronat e lira, në dispozicion, ndërsa akuzohet se i ka krijuar një dëm ekonomik shtetit.
