Një grua në Lipjan, të Prishtinës është arrestuar nga policia për shkak të dyshimit se ka kryer veprën penale “Lajmërimi apo kallëzimi i rremë”.
Sipas prokurorisë, gruaja ka bërë raportim të rremë pranë organeve të rendit, kundër bashkëshortit të saj, për veprën penale “Dhunë në familje”, ndaj të cilit është zhvilluar procedurë penale.
“Bashkëshorti i saj ka ushtruar kallëzim penal kundër të dyshuarës, për shkak të lajmërimit apo kallëzimit të rremë në polici, në vitin 2021 (rasti i lartcekur) dhe se në incizimin të cilin e posedon Prokurori i Shtetit, i ofruar si dëshmi nga tani i dëmtuari, e njëjta e pranon se në vitin 2021 ka gënjyer organet e hetuesisë me qëllim të përfitimit të dobisë pasurore për vete.”, është bërë e ditur në komunikatë.
Prokurori i Shtetit ka paraqitur kërkesë për caktimin e masës së arrestit shtëpiak ndaj të dyshuarës, në gjykatën kompetente.
