Kryetari i Partisë së Lirisë, Ilir Meta ka reaguar për shembjen e pallatit tek rruga ‘Myslym Keta’ në Tiranë, duke e cilësuar si një agresion të përsëritur dhe të paligjshëm.
Në një reagim në FB, Meta thekson se me këtë pallat po veprohet njësoj si tek Teatri Kombëtar, Astiri, Bregu i Lumit dhe 5 Maji.
“Shembja e pallatit në Rr. “Myslym Keta” është agresion i përsëritur në paligjshmëri të plotë dhe i egër ndaj qytetarëve të thjeshtë ashtu si tek Teatri Kombëtar, Astiri, Bregu i Lumit dhe 5 Maji. Natën dhe me dhunën e Policisë së “Rilindjes” qytetarëve ju rrëmbehet dhe ju shkatërrohet prona që të majmen klientët e “Rilindjes””, shkruan ndër të tjerash Meta.
Ish-presidenti shkruan se fëmijë, të moshuar, burra dhe gra janë hedhur në mes të rrugësd nga Veliaj dhe oligarkët përqark tij.
“Fëmijë, të moshuar, burra dhe gra janë hedhur në rrugë të madhe, që të vazhdojë grabitja dhe plaçkitja e bandës së Erion Veliaj dhe oligarkëve përqark tij. 14 maji është dita e madhe kur qytetarët e Tiranes do t’ju japin ndëshkimin më të rreptë këtyre agresorëve dhe hajdutëve të shfrenuar”, përfundon Meta.
