Politologu Ilir Kalemaj, këmbënguljen e Kryeministrit Edi Rama për të vazhduar me amnistinë fiskale, e sheh si të gabuar.
Ai thotë se një këmbëngulje e tillë vjen kundër gjithë rekomandimeve të Bashkimit Europian, Moneyval, Departamentit Amerikan të Shtetit dhe kundër rekomandimeve të gjithë organizmave ndërkombëtarë që kanë në fokus korrupsionin dhe pastrimin e parave, pasi tha se Shqipëria ndodhet në listën e vendeve gri.
Nga studio e MCN Live, deklaroi se për tavanin 2 milionë euro për legalizim, ekspertët bien dakord që një shifër e tillë është e pamundur që ta ketë një familje në perëndim me kursime.
“Ato familje e kanë krijuar jetën e tyre në vendin ku kanë shkuar, kanë blerë shtëpi atje apo janë investuar aty ku jetojnë. Kush është kjo familje shqiptare me 2 milionë euro të kursyera poshtë divanit? Duhet që një person që të ketë marrë 8 mijë euro në muaj për 30 vjet të ketë kursyer 2 milionë euro. Është e qartë që nuk bëhet për legalizimin e parave të shqiptarëve, por për legalizimin e aseteve kriminale, për pastrimin e asketeve kriminale në betonizimin e Tiranës, Durrësit dhe gjithë Shqipërisë. Është totalisht e gabuar, imorale, dhe bie në kundërshtim me parimet. Nuk i shërben biznesit dhe sipërmarrjes në Shqipëri, pasi është konkurrencë e pandershme nga ata që do i fusin këto para në qarkullim”, tha Kalemaj.
Sa i takon çështjes së aktin normativ për investimet strategjike dhe Portin e Durrësit, Kalemaj shtoi se çmimi që mendohej të fillonte me 1500 euro, por se shkoi direkt në 1800 euro.
Madje, ai shtoi se pas kësaj çështje mund të ketë nisur procesi i dhënies së pasaportave të arta dhe se 60-70% e blerësve të apartamenteve janë shtetas të huaj.
