Një ngjarje e rëndë ka ndodhur mbrëmjen e kësaj të Shtune në Gjermani, ku dy emigrantë nga Kosova kanë humbur jetën.
Viktimat janë Leutrim Hyseni 31 vjeç dhe Admir Seta 40 vjeç, të cilët kanë qenë duke kaluar hekurudhën, kur u përplasën nga treni.
Lajmin e ka bërë të ditur Shoqata Humanitare Dardania Wiesbaden, e cila u ka bërë thirrje të gjithë bashkatdhetarëve të ndihmojnë familjet e viktimave.
Për aksidentin ka shkruar edhe gazeta gjermane Wiesbadenaktuell.de, e cila ka njoftuar se sipas hetimeve policore, 31 dhe 40-vjeçari e kanë shpërfillur trenin që po afrohej rreth orës 18:05.
“Me gjithë frenimin emergjent të drejtuesit të mjetit, i cili është nisur menjëherë, treni i goditi dy personat”, shkruan gazeta.
Më tej, thuhet se edhe pse ekipet e shpëtimit kanë arritur shumë shpejt në vendngjarje, çdo ndihmë për ta ishte shumë vonë.
