Afera e inceneratorëve ishte një nga çështjet tek të cilat u ndal në konferencën e sotme për mediat kreu i Partisë Demokratike, Sali Berisha.
Ish-kryeministri u mor veçanërisht me publikimin e të dhënave nga e-mail i Klodian Zotos, ku janë zbuluar pagesat prej mijëra eurosh që përfituesit i 430 mln euro përmes skemës së djegësave ka bërë për llogari të ish-ministrit të Financave, Arben Ahmetaj.
Zoto i ka paguar Ahmetajt dhe bashkëshortes së tij dhjetëra bileta udhëtimesh në kryeqytetet europiane dhe ka rezervuar dhoma e suita në hotele nga më luksozet për ish-ministrin, në Milano, Vienë etj…
Por, sipas Berishës publikimi i këtyre dokumenteve tani po bëhet si pasojë e luftës së brendshme mes klaneve në PS. Kreu i PD tha se “të palarat” e Ahmetaj po i nxjerr krybashkiaku i Tiranës, Erjon Veliaj, ndaj edhe po bëhet një betejë e fortë në SPAK për zgjedhjen e kreut të ri që qeveria do t’i shërbejë atyre.
“Edi Rama ka hallin e Agaçit. Agaçi, bashkë me Ramën, janë krerët e organizatës kriminale të djegësve. Ministri i Financave nuk mund të bënte asnjë veprim pa firmën e kryeministrit. Po të mos e ekzonoronte Engjëll Agaçi me Edi Ramën, procedurën e mbyllur të ndërmarrjes së tyre, Arben Ahmetaj nuk lëvizte një qindarkë nga fondi rezervë i Këshillit të Ministrave. Këta janë kokat e aferës. Nuk e kursej Arben Ahmetaj, e meriton plotësisht, është përgjegjës plotësisht. Çfarë është ajo që shef, ajo e udhëtimeve? Është luftë brenda llojit? Erion Veliaj, se ka një shkresë aty, që për hir të së vërtetës, në çdo gjykim ligjor, Arben Ahmetaj bëhet bashkëfajtor. Por faji kryesor është i Erion Veliaj. Arben Ahmetaj konstaton se është në shkelje të rëndë ligjore, por shkruan se nuk është kompetencë e imja, por këtë vjedhje do e bëjë ai tjetri. Erion Veliaj ia nxjerr tani dokumentet poshtë e përpjetë, prandaj është beteja për SPAK-un”, tha Berisha.
