Ish-zv/kryeministri, Arben Ahmetaj ka reaguar për herë të parë pas akuzave ditët e fundit si personi “kyç” i përfshirë në aferën e inceneratorëve.
Në një kohë kur mediat “ziejnë” nga akuzat, Ahmetaj mohon gjithçka madje ngre alibinë edhe për gjobëvënie që siç e thotë ai ka ardhur si pasojë e ushtrimit të detyrës së ministër. Ish-ministri mohon të ketë udhëtuar ndonjëherë me Klodian Zoton apo të ketë përdorur kartën e tij për të bërë pagesa.
“Nuk janë dokumente origjinale. As kam udhëtuar e as kam përdorur kartën e ndokujt. Nuk kam asnjë lidhje me procedurën. Dikujt nuk i kanë pëlqyer qëndrimet e mia zyrtare si ministër. Ndoshta bëhet fjalë edhe për gjobëvënie. Nuk kam udhëtuar kurrë me Zoton dhe as kam përdorur kartën. Një tufë me media i marrin të mirëqena letrat. Unë kam udhëtuar vetëm me miq dhe ish-miq të mi, e Zoto nuk është as njëra, as tjetra”, – ka deklaruar Ahmetaj.
- Akuzat
Arben Ahmetaj , i njohur si “Tigri”, dyshohet se ka shijuar një jetë luksoze të sponsorizuar nga bosi i inceneratorëve, Klodian Zoto. Të dhëna të pakundërshtueshme kanë mbërritur në SPAK ku tregohet se Klodian Zoto ka paguar për udhëtimet e Ahmetajt dhe gruas së tij në disa vende të Europës si dhe qendrimin e tyre në hotele luksoze me 5 yje.
Prova e parë e dorëzuar nga nje gazetar investigiv është një e-mail ku një hoteli luksoz në Vjenë ka konfirmuar pagesën e Klodian Zotos në vitin 2013 për qëndrimin e Arben Ahmetajt. Bashkangjitur provave, është dhe karta e kreditit e shtetasit Klodian Zoto.
Një tjetër rezervim është ai në një hotel në Milano. Sipas emaileve të Zotos, ai ka rezervuar një dhomë Ambasador Suit për shtetasin Mirel Mërtiri, por në fakt i ftuar ka qenë ish-Ministri Arben Ahmetaj. Për këtë rezervim, në një nga hotelet më luksoze, Zoto ka paguar për Ahmetajn 1600 euro për 2 netë qëndrimi.
Në provën e tretë e paraqitur në kallëzimin e SPAK, është një tjetër email ku Zoto paguan një faturë në shtator të 2016 në një tjetër hotel në Milano, por kësaj here për gruan e Arben Ahmetajt, znj. Erjola Hoxha. Një natë qëndrimi në këtë hotel nis nga 1.500 euro deri në 8.000 euro për Suitën.
Në provën e katërt, është rezervimi i një hoteli sërish me 5 yje në Vjenë, ku Zoto ka paguar vetëm për dy netë rreth 1.180 euro.
Në mbyllje të hetimeve për korrupsion e pastrim parash ndaj 10 zyrtarëve; duke nisur nga ish ministri Lefter Koka e duke përfunduar tek biznesmenët Klodian Zoto e Stela Gugallja, SPAK këmbëngul se po vijon hetimet mbi provat që u nxorën nga kompjuterët e sekuestruar në banesën e Klodian Zotos.
