Gazetari Klodian Tomorri, e quan një “aferë shtetërore” historinë e inceneratorëve.
Në emisionin “Të Paekspozuarit”, Tomorri deklaroi se i gjithë shteti bie nëse kjo aferë hetohet seriozisht, pasi të gjithë segmentet e shtetit janë implikuar.
Gazetari shtoi se taksapaguesit shqiptarë vijojnë të paguajnë për inceneratorët edhe pse ata nuk funksionojnë dhe se prokuroria ka ngritur akuza penale.
“Si ka mundësi kur një koncesion është vërtetuar nga prokuroria, organet e drejtësisë, që ka qenë korruptiv dhe kemi persona në kërkim, si ka mundësi që pasi janë bërë këto, ne vazhdojmë paguajmë para për inceneratorët?
Kjo histori që ne nuk prishim kontrata se kemi frikën e arbitrazhit, është gënjeshtër shumë e madhe, Kur ti ke konstatuar keqbesim në një kontratë, nuk ka arbitrazh që të penalizon. Nëse ti anullon këtë kontratë nuk ka gjykatë që të dënon. Këtu vazhdon dhe paguhet.
Paguajnë 29 euro për çdo ton mbetje në Sharrë. Kjo duhet të ishte për depozitimin dhe incenerimin. Incenerim nuk ka, sepse nuk është ndërtuar incenerator. Vazhdojmë paguajmë 29 euro edhe pse ato nuk digjen. Po për negocimin e tarifës kush i ndalon?
Shtyhet pafund auditimi i kompanisë koncesionare, sepse dalin lakra të tjera po të auditohet. Thanë do të vijë në nëntor, tani e shtynë. Edhe Ministria e Financave, që ka detyrimin të publikojë, ndryshoi formatin dhe nuk publikon shpenzimet e kompanive koncesionare.
Nëse këtu fajtorët paskan qenë zoti Koka, Bllako, apo Arben Ahmetaj siç po na thonë sot, kush vazhdon i paguan paratë? Zoti Koka dhe Bllako janë në burg. Ahmetaj është njeriu më pafuqi në PS. Kush e mban në këmbë skemën e inceneratorëve?
Është aferë shtetërore. Po të hetohej, nuk bie vetëm qeveria, por bie shteti. Janë implikuar shumë institucione, praktikisht nuk do të kishte më shtet”, deklaroi Tomorri.
